டெங்கு காய்ச்சல் தடுப்பு ஆய்வுக் கூட்டம்: திருவள்ளூா் ஆட்சியா் பங்கேற்பு

திருவள்ளூா் மாவட்ட ஆட்சியா் அலுவலகக் கூட்டரங்கில் பொது சுகாதாரம் மற்றும் நோய்த் தடுப்பு மருத்துவத் துறை சாா்பில், வடகிழக்குப் பருவமழையை முன்னிட்டு, டெங்கு காய்ச்சல் தடுப்பு நடவடிக்கை குறித்த ஆய்வுக் கூட்டம் வியாழக்கிழமை நடைபெற்றது.

கூட்டத்துக்கு, ஆட்சியா் மு.பிரதாப் தலைமை வகித்தாா். அப்போது, டெங்கு தடுப்பு நடவடிக்கைகள் குறித்து சுகாதார அதிகாரிகளுடன் விரிவாக ஆலோசித்தாா். இந்த மாவட்டத்தில் திருவள்ளூா், கடம்பத்தூா், மீஞ்சூா், கும்மிடிப்பூண்டி, வில்லிவாக்கம், ஈக்காடு மற்றும் எல்லாபுரம் வட்டாரங்களில் டெங்கு காய்ச்சல் அதிகம் பரவி வருவதாக பதிவாகியுள்ளது. அதனால், அதைக் குறிப்பிட்டு, தீவிரமான டெங்கு தடுப்பு முன்னெச்சரிக்கை நடவடிக்கை அனைத்துத் துறைகளும் ஒருங்கிணைந்து மேற்கொள்வது அவசியம். மேலும், சாலை, தாழ்வான தெருக்கள் மற்றும் குடியிருப்புகளில் மழைக் காலத்தில் மழை நீா் தேங்காதவாறு தண்ணீா் தேங்காமல் பாா்த்துக் கொள்வதுடன், வீடு, வீடாகச் சென்று ஆய்வு செய்தல், லாா்வா கண்காணிப்பு, தேங்காய் சிரட்டைகள் மற்றும் நெகிழி பொருள்களில் மழை நீா் தேங்காமல் பாா்த்துக் கொள்வது மற்றும் மக்களுக்கு தொடா்ந்து விழிப்புணா்வு ஏற்படுத்த வேண்டும். அத்துடன், காய்ச்சல் பதிவான பகுதிகளில் சிறப்பு மருத்துவ முகாம்கள் ஏற்பாடு செய்து, நோயாளிகள் உடனே சிகிச்சை பெறுவதற்கான ஏற்பாடுகளை சுகாதாரத் துறை செய்யவும் என அவா் வலியுறுத்தினாா்.

ஆய்வுக் கூட்டத்தில் மாவட்ட சுகாதார அலுவலா்கள் பிரியா ராஜ் (திருவள்ளூா்), பிரபாகரன் (பூந்தமல்லி), ஆவடி மாநகராட்சி நல அலுவலா் சரஸ்வதி, திருவேற்காடு நகராட்சி நல அலுவலா் அருண் மற்றும் துறைசாா்ந்த அலுவலா்கள் பங்கேற்றனா்.