செயில் நிகர லாபம் 81 சதவீதம் சரிவு

செயில் எனப்படும் ஸ்டீல் அத்தாரிட்டி ஆஃப் இந்தியாவின் நிகர லாபம் முதல் காலாண்டில் 81 சதவீத சரிவை சந்தித்துள்ளது.
இதுகுறித்து அந்த நிறுவனம் செபியிடம் தெரிவித்துள்ளதாவது: நடப்பு நிதியாண்டின் ஏப்ரல் முதல் ஜூன் மாதம் வரையிலான முதல் காலாண்டில் செயில் நிறுவனம் செயல்பாடுகள் மூலம் ரூ.14,820.89 கோடி வருவாய் ஈட்டியது. கடந்த நிதியாண்டின் இதே காலகட்டத்தில் ஈட்டி வருவாயான ரூ.15,907.53 கோடியுடன் ஒப்பிடும்போது இது குறைவானதாகும்.
வருமானம் குறைந்து போனதையடுத்து நிகர லாபம் ரூ.551.96 கோடியிலிருந்து 81 சதவீத சரிவைக் கண்டு ரூ.102.68 கோடியாகி உள்ளது.  கச்சா உருக்கு உற்பத்தி 49.45 லட்சம் டன்னிலிருந்து  39.30 லட்சம் டன்னாக குறைந்தது என செயில் நிறுவனம் தெரிவித்துள்ளது. நிதி நிலை முடிவுகள் குறித்து செயில் நிறுவன தலைவர் அனில் குமார் தனியாக வெளியிட்ட அறிக்கையில் தெரிவித்துள்ளதாவது:
கடந்த ஆண்டுடன் ஒப்பிடுகையில் நடப்பாண்டின் முதல் காலாண்டில் உள்நாட்டு உருக்குத் துறையில் தேவை மந்த நிலையிலேயே உள்ளது. இருப்பினும், உள்கட்டமைப்பு மற்றும் கட்டுமானம் உள்ளிட்ட உருக்கு பயன்பாடு அதிகம் உள்ள துறைகளில் அதிக அளவில் முதலீடு செய்ய மத்திய அரசு திட்டமிட்டுள்ளது. இது, நடப்பு நிதியாண்டி எஞ்சிய நாள்களில் உருக்கு துறையில் நேர்மறையான தாக்கத்தை ஏற்படுத்தும் என எதிர்பார்க்கிறோம் என்று அந்த அறிக்கையில் அனில் குமார் தெரிவித்துள்ளார்.