மொத்த விலை பணவீக்கம் அதிகரிப்பு

மொத்த விலை குறியீட்டெண் அடிப்படையிலான பணவீக்கம் கடந்த 27 மாதங்களில் இல்லாத அளவுக்கு பிப்ரவரி மாதத்தில் 4.17 சதவீதமாக உயா்ந்தது. எரிபொருள், உணவுப் பொருள்களின் விலை அதிகரிப்பே பணவீக்க உயா்வுக்கு காரணம் என்று தெரிவிக்கப்பட்டுள்ளது.

இதுகுறித்து மத்திய அரசு வெளியிட்டுள்ள புள்ளிவிவரங்கள் தெரிவிப்பதாவது:

மொத்த விலை குறியீட்டெண் அடிப்படையிலான பணவீக்கம் கடந்த ஜனவரி மாதத்தில் 2.03 சதவீதமாக இருந்தது. கடந்த ஆண்டு பிப்ரவரி மாதம் பணவீக்கம் 2.26 சதவீதம் என்ற அளவிலேயே இருந்தது.

பிப்ரவரி மாதத்தில் உணவுப் பொருள் பணவீக்கம் 1.36 சதவீதமாக இருந்தது. இதுவே ஜனவரி மாதம் -2.8 சதவீதமாக இருந்தது. காய்கறிகள் பிரிவில் மட்டும் பிப்ரவரி மாதத்தில் மொத்தவிலை பணவீக்கம் -2.9 ஆக இருந்தது. முந்தைய மாதத்தில் அது -20.82-ஆக இருந்தது.

பிப்ரவரி மாதத்தில் எரிபொருள்கள் பிரிவில் பணவீக்கம் 0.58 சதவீதம் அதிகரித்துள்ளது. கடந்த ஜனவரி மாதத்தில் இது -4.78-ஆக இருந்தது என அந்தப் புள்ளிவிவரங்கள் தெரிவிக்கின்றன.