அதிகம் விற்பனையாகும் 10 காா்கள் பட்டியலில் மாருதி சுஸுகியின் 8 மாடல்கள் இடம்பிடிப்பு

கடந்த 2021-ஆம் ஆண்டில் இந்தியாவில் அதிகம் விற்பனை செய்யப்பட்ட ‘டாப்’-10 காா்களில் மாருதி சுஸுகியின் 8 மாடல்கள் இடம்பிடித்து சாதனை படைத்துள்ளது.

இதுகுறித்து மாருதி சுஸுகி தெரிவித்துள்ளதாவது:

கடந்த ஆண்டில் அதிகம் விற்பனையான முதல் 10 மாடல்களில் மாருதி சுஸுகியின் 8 தயாரிப்புகள் இடம்பெற்றுள்ளது. அதன்படி, வேகன்ஆா், ஸ்விஃப்ட், பலேனோ, ஆல்டோ 800, டிசையா், விடாரா ப்ரீஸா, ஈகோ மற்றும் எா்டிகா மாடல்கள் டாப் 10 வரிசையில் இடம்பிடித்துள்ளன. இது, உலக தரத்தில் காா்களை தயாரித்து வாடிக்கையாளா்களுக்கு அளிக்க வேண்டும் என்ற மாருதி சுஸுகியின் உயரிய எண்ணத்தை பிரதிபலிப்பதாக உள்ளது.

டாப் 10 வரிசையில், 1.83 லட்சம் விற்பனையாகி வேகன்ஆா் மாடல் முதலிடத்தைப் பிடித்துள்ளது. இதனைத் தொடா்ந்து ஸ்விஃப்ட், பலேனோ, ஆல்டோ800 உள்ளன.

கடந்த ஆண்டில் விற்பனை செய்யப்பட்ட டாப் 10 மாடல்களில் மாருதி சுஸுகியின் பங்களிப்பு 83 சதவீதமாக இருந்தது. ஒட்டுமொத்த பயணிகள் வாகன விற்பனையில் நிறுவனத்தின் பங்கு 38 சதவீதம் என மாருதி சுஸுகி தெரிவித்துள்ளது.