ஐசிஐசிஐ வங்கியின் நிகர லாபம் ரூ.9,852.7 கோடியாக உயர்வு

மும்பை: தனியார் வங்கியான ஐசிஐசிஐ வங்கி 2022-23ஆம் நிதியாண்டின் ஜனவரி முதல் மார்ச் வரையிலான காலாண்டில் ஒருங்கிணைந்த நிகர லாபம் 27.64 சதவீதம் அதிகரித்து 9,852.70 கோடி ரூபாயாக அதிகரித்துள்ளது.

சந்தை மூலதனத்தின் அடிப்படையில் இந்தியாவின் இரண்டாவது பெரிய தனியார் துறை வங்கியான ஐசிஐசிஐ வங்கி மார்ச் காலாண்டில் அதன் நிகர லாபம் கிட்டத்தட்ட 30 சதவீதம் அதிகரித்து ரூ..9,121.87 கோடியாக பதிவாகியது. இந்நிறுவனத்தின் மொத்த வருவாய் ரூ.27,412.32 கோடியிலிருந்து அதிகரித்து ரூ.36,108.88 கோடியாகவும், ஒட்டுமொத்த செலவினங்கள் ரூ.17,119.38 கோடியிலிருந்து ரூ.22,282.50 கோடியாகவும் அதிகரித்துள்ளது.

இதன் மொத்த ஒதுக்கீடு முந்தைய ஆண்டு ரூ.1,068.95 கோடியிலிருந்து அதிகரித்து ரூ.1,619.80 கோடியானது. ஆனால் டிசம்பர் காலாண்டில் அதுவே ரூ.2,257.44 கோடியுடன் ஒப்பிடும்போது இது சற்று குறைந்துள்ளது.