தள்ளாடிய சந்தையில் சென்செக்ஸ் 45 புள்ளிகள் சரிவு

இந்த வாரத்தின் மூன்றாவது வர்த்தக தினமான புதன்கிழமையும் பங்குச்சந்தை எதிர்மறையாக முடிந்தது. இதைத் தொடர்ந்து, மும்பை பங்குச் சந்தைக் குறியீட்டு எண் சென்செக்ஸ் 45 புள்ளிகளை இழந்தது.

உலகளாவிய சந்தைக் குறிப்புகள் கலவையாக இருந்தன. இதன் தாக்கத்தால் உள்நாட்டுச் சந்தை பலவீனமாகத் தொடங்கி கீழே சென்றது. ஆனால், பிற்பகல் வர்த்தகத்தில் ஆட்டோ, மெட்டல், ரியால்ட்டி, ஆயில் அண்ட் காஸ் நிறுவனப் பங்குகளுக்கு ஆதரவு கிடைத்தது. இருப்பினும், இறுதியில் சந்தை எதிர்மறையாக முடிந்தது என்று பங்கு வர்த்தகத் தரகு நிறுவனங்கள் தெரிவித்தன.

சந்தை மதிப்பு உயர்வு: சந்தை மூலதன மதிப்பு ரூ.2.25 லட்சம் கோடி உயர்ந்து வர்த்தக இறுதியில் ரூ.400.69 லட்சம் கோடியாக இருந்தது. அந்நிய நிறுவன முதலீட்டாளர்கள் செவ்வாய்க்கிழமை ரூ.3,668.84 கோடிக்கு பங்குகளை விற்றிருந்த நிலையில், உள்நாட்டு நிறுவனங்கள் ரூ.2,304.50 கோடிக்கு பங்குகளை வாங்கியிருந்தன.

சென்செக்ஸ் சரிவு: சென்செக்ஸ் காலையில் 286.85 புள்ளிகள் குறைந்து 73,225.00-இல் தொடங்கி 73,073.92 வரை கீழே சென்றது. பின்னர், அதிகபட்சமாக 73,684.93 வரை மேலே சென்ற சென்செக்ஸ், இறுதியில் 45.46 புள்ளிகளை (0.06 சதவீதம்) இழந்து 73,466.39-இல் முடிவடைந்தது. மும்பை பங்குச் சந்தையில் மொத்தம் வர்த்தகமான 3,926 பங்குகளில் 2,128 பங்குகள் ஆதாயப் பட்டியலிலும், 1,667 பங்குகள் வீழ்ச்சிப் பட்டியலிலும் இருந்தன. 131 பங்குகள் விலையில் மாற்றமின்றி நிலைபெற்றன.

15 பங்குகள் விலை உயர்வு: சென்செக்ஸ் பட்டியலில் டாடா மோட்டார்ஸ், பவர்கிரிட், என்டிபிசி, எல் அண்ட் டி, மாருதி, நெஸ்லே உள்பட15 பங்குகள் விலை உயர்ந்த பட்டியலில் இருந்தன. அதே சமயம், ஏசியன் பெயின்ட், அல்ட்ரா டெக் சிமென்ட், ஹிந்துஸ்தான் யுனிலீவர், ஹெச்டிஎஃப்சி வங்கி, ஹெச்சிஎல் டெக், பஜாஜ் ஃபைனான்ஸ் உள்பட 15 பங்குகள் வீழ்ச்சிப் பட்டியலில் இருந்தன.

நிஃப்டி: தேசிய பங்குச்சந்தையில் 50 முதல் தரப் பங்குகளை உள்ளடக்கிய நிஃப்டி வர்த்தக இறுதியில் மாற்றமின்றி 22,302.50-இல் முடிவடைந்தது. வர்த்தகத்தின் போது 22,185.20 வரை கீழே சென்ற நிஃப்டி பின்னர் அதிகபட்சமாக 22,368.65 வரை மேலே சென்றது. நிஃப்டி பட்டியலில் 25 பங்குகள் ஆதாயப் பட்டியலிலும், 24 பங்குகள் வீழ்ச்சிப் பட்டியலிலும் இருந்தன.