திருப்புகழ் - 760

மன மயக்கங்கள் அறவேண்டும் என்று கோரும் இப்பாடல் இராமேசுரத்துக்குரியது.

அடிக்கு ஒற்றொழித்து 25 எழுத்துகளைக் கொண்ட பாடல்.  ஒன்று, மூன்று, ஐந்து ஆகிய சீர்களில் இரண்டு நெட்டெழுத்துகளும்; இரண்டு, நான்கு, ஆறு ஆகிய சீர்களில் ஐந்து குற்றெழுத்துகளும் ஒரு (கணக்கில் சேராத) வல்லொற்றும் உள்ளன.

தானா தனத்ததன தானா தனத்ததன
                தானா தனத்ததன தனதான

வானோர் வழுத்துனது பாதார பத்மமலர்
                        மீதே பணிக்கும்வகை யறியாதே

மானார் வலைக்கணதி லேதூளி மெத்தையினி
                        லூடே யணைத்துதவு மதனாலே

தேனோ கருப்பிலெழு பாகோ விதற்கிணைக
                        ளேதோ வெனக்கலவி பலகோடி

தீரா மயக்கினொடு நாகா படத்திலெழு
                        சேறாடல் பெற்றதுய ரொழியேனோ

மேனாடு பெற்றுவளர் சூராதி பற்கெதிரி
                        னூடேகி நிற்குமிரு கழலோனே

மேகார வுக்ரபரி தானேறி வெற்றிபுனை
                        வீரா குறச்சிறுமி மணவாளா

ஞானா பரற்கினிய வேதாக மப்பொருளை
                        நாணா துரைக்குமொரு பெரியோனே

நாரா யணற்குமரு காவீறு பெற்றிலகு
                        ராமே சுரத்திலுறை பெருமாளே.