திருட்டு வழக்கில் வடமாநில இளைஞா்கள் கைது

ஸ்ரீவில்லிபுத்தூா் அருகேயுள்ள ஹோட்டலில் நிறுத்தப்பட்ட தனியாா் ஆம்னி பேருந்தில் பயணியிடம் நகை திருடிய வட மாநில இளைஞா்கள் 4 பேரை போலீஸாா் செவ்வாய்க்கிழமை கைது செய்தனா்.

தென்காசி மாவட்டம், சங்கரன்கோவில் பகுதியைச் சோ்ந்தவா் பட்டமுத்து (32). இவா், சென்னையில் உள்ள தனியாா் நிறுவனத்தில் பணிபுரிந்து வருகிறாா். இந்த நிலையில், சொந்த ஊருக்கு வந்திருந்த பட்டமுத்து தனது மனைவியுடன் சென்னை செல்வதற்காக கடந்த 10-ஆம் தேதி இரவு ஆம்னி பேருந்தில் சென்றாா்.

மதுரை - கொல்லம் தேசிய நெடுஞ்சாலையில் ஸ்ரீவில்லிபுத்தூா் அருகே அழகாபுரியில் உள்ள ஹோட்டலில் இரவு உணவுக்காக பேருந்து நின்றது. இதையடுத்து, உணவு சாப்பிட்ட பின் பேருந்துக்கு வந்து பாா்த்தபோது கைப்பையிலிருந்த 3.5 பவுன் தங்க நகை திருடுபோனது தெரியவந்தது.

இதுகுறித்த புகாரின்பேரில், நத்தம்பட்டி போலீஸாா் வழக்குப் பதிந்து சிசிடிவி காட்சிகளை ஆய்வு செய்தபோது, காரில் வந்த கும்பல் நகையைத் திருடியது தெரியவந்தது.

அதனடிப்படையில், மத்தியப் பிரதேச மாநிலம், தாா் மாவட்டத்தைச் சோ்ந்த அப்பாஸ்கான் (32), அக்ரம்கான் (26), மோலா (36), அக்ரம் முல்தானி (26) ஆகிய 4 பேரை கைது செய்த போலீஸாா், தங்க நகை, காரை பறிமுதல் செய்தனா்.

மேலும், இந்தக் கும்பலுக்கு வேறு ஏதேனும் குற்றச் சம்பவங்களில் தொடா்புள்ளதா, இவா்கள் தமிழகத்துக்கு எதற்காக வந்தாா்கள் என்பது குறித்து போலீஸாா் விசாரித்து வருகின்றனா்.

திருட்டுச் சம்பவம் நடைபெற்ற 24 மணி நேரத்துக்குள் குற்றவாளிகளைக் கைது செய்த காவல் ஆய்வாளா் சந்திரன், குற்றப்பிரிவு போலீஸாரை விருதுநகா் காவல் கண்காணிப்பாளா் கண்ணன் பாராட்டினாா்.