கல்லூரி மாணவா்களுக்கு கஞ்சா விற்பனை செய்த 4 போ் கைது

ஸ்ரீவில்லிபுத்தூா் அருகேயுள்ள கிருஷ்ணன்கோவிலில் கல்லூரி மாணவா்களுக்கு கஞ்சா விற்பனை செய்த 4 பேரை போலீஸாா் செவ்வாய்க்கிழமை கைது செய்தனா்.

ஸ்ரீவில்லிபுத்தூா் அருகேயுள்ள கிருஷ்ணன்கோவில் காவல் நிலைய ஆய்வாளா் தேவமாதா, காவல் சாா்பு ஆய்வாளா் மதிவாணன் ஆகியோா் தலைமையிலான போலீஸாா் செவ்வாய்க்கிழமை ரோந்துப் பணியில் ஈடுபட்டனா்.

இந்த நிலையில், மதுரை - கொல்லம் தேசிய நெடுஞ்சாலையில் குன்னூா் விலக்குப் பகுதியில் இருசக்கர வாகனங்களில் வந்த 6 பேரை நிறுத்தி சோதனை செய்தபோது, அவா்களிடம் 50 கிராம் கஞ்சா இருப்பது தெரியவந்தது. தொடா்ந்து நடத்திய விசாரணையில், சுரேஷ்லிங்கம் என்பவா் சிவகாசி கொலை வழக்கில் தொடா்புடையவா் எனத் தெரியவந்தது.

இதையடுத்து, அவா்கள் கூறிய வீட்டில் சோதனை செய்தபோது, அங்கு 3 பட்டா கத்திகள், 550 கிராம் கஞ்சா, எடை இயந்திரம் ஆகியவை இருந்தது கண்டறியப்பட்டது.

இந்த நிலையில், இருசக்கர வாகனத்தில் வந்த சிவகாசி அருகேயுள்ள திருத்தங்கல் பகுதியைச் சோ்ந்த சுரேஷ்லிங்கம் (25), மாரியப்பன் (23), அா்ஜுனைராஜன் (21), ஹரிஹரன்(20) ஆகிய 4 பேரை போலீஸாா் கைது செய்து விசாரித்து வருகின்றனா். மேலும், தப்பியோடிய காா்த்திக், காளிமுத்து ஆகியோரைத் தேடி வருகின்றனா்.

இதுகுறித்து போலீஸாா் கூறியதாவது: கொலை வழக்கில் கைதான சுரேஷ்லிங்கம் ஜாமீனில் வெளியே வந்த நிலையில், நண்பா்களுடன் சோ்ந்து கல்லூரி மாணவா்களுக்கு கஞ்சா விற்பனை செய்து வந்துள்ளாா்.

இவா்கள், கிருஷ்ணன்கோவில் தனியாா் பல்கலைக்கழகத்தில் பயிலும் ஹரிஹரன் என்பவரது வீட்டில் தங்கி கஞ்சா விற்பனை செய்து வந்தனா். இதையடுத்து, 4 பேரை கைது செய்து, 550 கிராம் கஞ்சா, 3 பட்டா கத்தி, 2 இருசக்கர வாகனங்கள் ஆகியவற்றை பறிமுதல் செய்துள்ளோம். மேலும், தப்பியோடிய இருவரைத் தேடி வருகிறோம் என்றனா்.