குப்பைகள் கொட்டுவதைத் தடுக்க காண்காணிப்பு கேமிரா பொருத்தம்

சிவகாசியில் பொதுமக்கள் குப்பைகள் கொட்டுவதைத் தடுத்து, கண்காணிக்க முகநூல் நண்பா்கள் சாா்பில் கண்காணிப்பு கேமிரா பொருத்தப்பட்டது.

சிவகாசியில் ஏழுகோவில் தெரு பகுதியில் தனியாா் பள்ளி அமைந்துள்ளது. இங்கு கடை வீதிக்குச் செல்லும் சாலை உள்ளிட்ட நான்கு சாலைகள் சந்திக்கின்றன. இந்சச் சாலையின் திருப்பத்தில் பொதுமக்கள் குப்பைகளைக் கொட்டி வந்தனா். இதனால், இந்தப் பகுதியில் சுகாதாரச் சீா்கேடு ஏற்பட்டது.

இந்தப் பகுதியில், குப்பைகளைக் கொட்டக்கூடாது என மாநகராட்சி அறிவிப்பு வெளியிட்டது. தொண்டு நிறுவனத்தைச் சோ்ந்தோா் இங்கு வண்ணக் கோலமிட்டு அழகூட்டினா்.

இருப்பினும், குப்பைகளைக் கொட்டுவதைப் பொதுமக்கள் நிறுத்தவில்லை.

இதையடுத்து, இந்தப் பகுதியில் குப்பைகளைக் கொட்டக் கூடாது. மீறினால் ரூ.2000 அபராதம் விதிக்கப்படும் எனவும், பொதுமக்களின் செயல்பாடுகளைக் கண்காணிக்க கேமிரா பொருத்தப்பட்டுள்ளதாகவும் தற்போது விளம்பரப் பதாகை வைக்கப்பட்டுள்ளது.

இதுகுறித்து பசுமை மன்ற நிா்வாகி ரத்தினம் வெள்ளிக்கிழமை கூறியதாவது:

நகரையும் நாம் சாா்ந்துள்ள பகுதிகளையும் சுத்தமாக வைத்திருப்பது நம் ஒவ்வொருவருடைய கடமை. ஏழுகோவில் தெரு பகுதியில் குப்பைகள் கொட்டப்படுவதைத் தடுக்க மாநகராட்சி பல நடவடிக்கைகளை எடுத்தும் பலன் இல்லை. இதனால், எங்கள் மன்றம் சாா்பில் குப்பைகள் கொட்டப்படுவதைத் தடுக்க கண்காணிப்பு கேமிரா பொருத்தப்பட்டு, அதில் பதிவாகும் காட்சிகளை மன்ற நிா்வாகிகள் காணும் வகையில் அவா்களது கைப்பேசியுடன் இணைக்கப்பட்டுள்ளது. வீடுகளுக்குச் சென்று குப்பைகளைப் பெறும் திட்டத்தையும் செயல்படுத்தி வருகிறோம். எனவே, இனி இந்த இடத்தில் பொதுமக்கள் குப்பைகளைக் கொட்டமாட்டாா்கள் என நம்புகிறோம் என்றாா் அவா்.