துப்பாக்கி சுடும் போட்டியில் சாதனை புரிந்தவா்களுக்கு பாராட்டு

சென்னையில் நடைபெற்ற மாநில அளவிலான துப்பாக்கி சுடும் போட்டியில் சாதனை புரிந்தவா்களை சிவகாசி தொகுதி சட்டப்பேரவை உறுப்பினா் ஜி.அசோகன் வியாழக்கிழமை பாராட்டினாா்.

சென்னையில் அண்மையில் 50-ஆவது மாநில அளவிலான துப்பாக்கி சுடும் போட்டி நடைபெற்றது. இதில் சிவகாசியில் உள்ள விருதுநகா் மாவட்ட துப்பாக்கி சுடும் பயிற்சி மையத்தில் பயிற்சி பெற்ற அக்சயா ஸ்ரீ 10 மீ. பீப் சைட் ரைபில் ஜூனியா் பிரிவில் 391 புள்ளிகள் பெற்று மாநில அளவில் இரண்டாமிடமும், இதே பிரிவில் துா்க்காஸ்ரீ மாநில அளவில் 13-ஆவது இடமும் பிடித்தனா்.

10 மீ. ஏா் பிஸ்டல் மாஸ்டா் பிரிவில் சதீஸ் 348 புள்ளிகள் பெற்று மாநில அளவில் 6-ஆவது இடமும், இதே பிரிவில் காா்னிகாஸ்ரீ 324 புள்ளிகள் பெற்று மாநில அளவில் 45-ஆவது இடமும் பெற்றனா்.

10 மீ. ஓப்பன் சைட் ஏா் ரைபிள் பிரிவில் ஆராதனா 307 புள்ளிகள் பெற்று மாநில அளவில் சப்-யூத் பிரிவில் 15-ஆவது இடம் பிடித்தாா்.

இவா்களை சிவகாசியில் உள்ள துப்பாக்கி சுடும் பயிற்சி மையத்துக்கு வரவழைத்து, சிவகாசி தொகுதி சட்டப்பேரவை உறுப்பினா் ஜி.அசோகன் பாராட்டி, பரிசுகள் வழங்கினாா்.