மொழி, மாநில உரிமைகளைப் பறிக்க மத்திய அரசு முயற்சி: துணை முதல்வா்

மொழி, மாநில உரிமைகளைப் பறிக்கும் முயற்சியை மத்திய அரசு மேற்கொண்டு வருவதாக தமிழக துணை முதல்வா் உதயநிதி ஸ்டாலின் குற்றஞ்சாட்டினாா்.

விருதுநகா் மாவட்டம், சாத்தூா் தனியாா் மண்டபத்தில் சாத்தூா் சட்டப்பேரவைத் தொதிக்குள்பட்ட திமுக நிா்வாகிகளின் ஆலோசனைக் கூட்டம் செவ்வாய்க்கிழமை நடைபெற்றது.

இந்தக் கூட்டத்துக்கு தமிழக துணை முதல்வரும், திமுக இளைஞரணி செயலருமான உதயநிதி ஸ்டாலின் தலைமை வகித்துப் பேசியதாவது: ஒரு சில மாதங்களில் விடுபட்ட அனைவருக்கும் மகளிா் உரிமைத் தொகை வழங்கப்படும். தமிழகத்தின் வளா்ச்சியைப் பொறுத்துக் கொள்ள முடியாமல் மத்திய அரசு தொடா்ச்சியாக தினமும் புதுப்புது நெருக்கடிகளை கொடுத்து வருகிறது. மொழி, மாநில உரிமைகளைப் பறிக்கும் முயற்சியை மத்திய அரசு மேற்கொண்டு வருகிறது என்றாா் அவா்.

முதல்வரின் வெளிநாட்டுப் பயணம் குறித்து வெள்ளை அறிக்கை வெளியிட வேண்டும் என பாஜக தேசிய செயற்குழு உறுப்பினா் அண்ணாமலை கூறியது குறித்த செய்தியாளா்களின் கேள்விக்கு, வெளிநாட்டுப் பயணம் குறித்து ஏற்கெனவே முதல்வரும், அமைச்சா் டி.ஆா்.பி. ராஜாவும் விளக்கமளித்துவிட்டனா். இதற்கு மேல் யாா் விளக்கம் கொடுக்க முடியும். தூங்குபவா்களை எழுப்பலாம். ஆனால், தூங்குவதுபோல நடிப்பவா்களை எழுப்ப முடியாது என்றாா் உதயநிதி ஸ்டாலின்.

இந்த ஆலோசனைக் கூட்டத்தில் நிதி அமைச்சா் தங்கம் தென்னரசு, வருவாய், பேரிடா் மேலாண்மைத் துறை அமைச்சா் கே.கே.எஸ்.எஸ். ஆா். ராமச்சந்திரன் வாக்குச்சாவடி முகவா்கள், மாவட்ட அணி அமைப்பாளா்கள், பொதுக்குழு உறுப்பினா்கள் உள்ளிட்ட பலா் கலந்துகொண்டனா்.

ஸ்ரீவில்லிபுத்தூரில்...

ஸ்ரீவில்லிபுத்தூா் சட்டப்பேரவைத் தொகுதிக்குள்பட்ட திமுக நிா்வாகிகள் ஆலோசனைக் கூட்டம் கிருஷ்ணன்கோவில் அருகே தனியாா் மண்டபத்தில் நடைபெற்றது.

கூட்டத்துக்கு துணை முதல்வா் உதயநிதி ஸ்டாலின் தலைமை வகித்தாா். அமைச்சா்கள் கே.கே.எஸ்.எஸ்.ஆா். ராமச்சந்திரன், தங்கம் தென்னரசு ஆகியோா் முன்னிலை வகித்தனா்.

இந்தக் கூட்டத்தில் உதயநிதி ஸ்டாலின் பேசியதாவது: கட்சியின் தலைவராக முதல்வா் மு.க. ஸ்டாலின் பொறுப்பேற்றப் பிறகு, அனைத்துத் தோ்தல்களிலும் திமுக வெற்றி பெற்றுள்ளது.

10 யானைகள் சோ்ந்தாலும் திமுக என்ற ஆலமரத்தைச் சாய்க்க முடியாது. திமுகவை எதிா்க்கத் தகுதியான எதிரிகள் தமிழ்நாட்டில் இல்லை.

முன்னாள் முதல்வா் ஜெயலலிதாவின் இறப்புக்குப் பிறகு, எடப்பாடி பழனிசாமி தலைமையிலான ஆட்சியில் தமிழ்நாட்டின் உரிமைகள் பறிக்கப்பட்டன.

தமிழகம் என்றும் பாசிச சக்திக்கு எதிரானது என்பதை வருகிற 2026 சட்டப்பேரவைத் தோ்தலில் நிரூபிக்க வேண்டும். ஸ்ரீவில்லிபுத்தூா் தொகுதியின் வெற்றி தமிழ்நாட்டுக்கு திருப்பு முனையாக அமைய வேண்டும் என்றாா் அவா்.