எஸ். கே. எல். எஸ். கேலக்சி மால் புரொடக்ஷன்ஸ் நிறுவனத்துடன் மெட்ராஸ் ஸ்டோரிஸ் நிறுவனம் இணைந்து தயாரித்து வரும் படத்தை சர்ஜுன் எழுதி இயக்குகிறார். "மா', "லட்சுமி' உள்ளிட்ட பல சர்ச்சைக்குரிய குறும்படங்களையும், நயன்தாரா நடித்த "ஐரா' படத்தையும் இயக்கியவர் சர்ஜுன்.
இன்னும் பெயரிடப்படாத இப்படத்தில் கலையரசன் கதாநாயகனாக நடிக்கிறார். அவருக்கு ஜோடியாக மிர்னா நடிக்கிறார். மற்ற கதாபாத்திரங்களுக்கான நடிகர்கள் தேர்வு நடந்து வருகிறது. ஒரு அசாதாரணமான சூழலில் தனிமையில் இருக்கும் பெண்ணை ஒரு இளைஞன் சந்திக்க நேருகிறது. அந்த சூழலில் நடக்கும் விஷயங்களை இருவரும் எவ்வாறு சந்தித்து, பயணித்து கடந்து போகிறார்கள் என்பதை கதை.
""ஆண்மையும் பெண்மையும் உருவங்கள் மட்டுமே இல்லை. அதில் அவ்வளவு உணர்வுகள் உண்டு. ஒருவருக்குள் ஒருவர் தொலையாமல், ஒருவருக்குள் ஒருவர் தேடாமல், அடைய வேண்டும் என்று நினைக்கிற போதுதான் அசிங்கமாகி விடுகிறோம். ஒருவரின் வலியை இன்னொருவர் புரிந்துக் கொள்ளும் போதுதான் வாழ்க்கை அழகாக மாறுகிறது. ஒரு விஷயத்தை இன்னொரு விஷயத்தில் தேடும் போதும், தொலைக்கும் போதும்தான் நாம் மனிதர்களாக ஆகிறோம்'' என்றார் இயக்குநர்.