வணிகவரிச் சட்டத்தின் கீழ் பதிவுச் சான்றிதழ்: வீட்டிலிருந்தே விண்ணப்பிக்கலாம்!

வணிகவரிச் சட்டத்தின் கீழ் வணிக நடவடிக்கைகளை மேற்கொள்வதற்கான பதிவுச் சான்றிதழை வீட்டிலிருந்தே ஆன்லைன் மூலம் விண்ணப்பிக்கலாம். அதற்காக தமிழக அரசு புதியதாக ஈசி டேக்ஸ் - டோட்டல் சொல்யுஷன் என்ற நோக்கத்தில் இணைய தளத்தை வடிவமைத்துள்ளது. அது தற்போது பயன்பாட்டில் உள்ளது.

இந்த புதிய இணைய தளம் மூலம் தமிழ்நாட்டில் உள்ள அனைத்து வணிகவரித்துறை அலுவலகங்களும் இணைக்கப்பட்டுள்ளன. அனைத்து நடவடிக்கைகளும் இந்த இணையதளத்தின் வாயிலாக, ஆன்லைன் மூலம் மேற்கொள்ள நடவடிக்கை எடுக்கப்பட்டுள்ளது. புதிதாக பதிவுச் சான்றிதழ் பெறுதல், பதிவுச் சான்றிதழை ரத்து செய்தல், வணிகர்களுக்கு விற்பனை சம்பந்தமான படிவங்களைப் பெறுதல் உள்ளிட்ட பல்வேறு நடவடிக்கைகள் இந்த புதிய இணைய தளத்தின் வாயிலாக நடைபெற்று வருகின்றன.

இந்த இணைய தளத்தின் வாயிலாக புதிதாக பதிவுச் சான்றிதழ் பெற விரும்புபவர்கள் வீட்டில் கணினி, இணைய தள வசதி இருந்தால் தங்களுடைய வீடுகளில் இருந்தே கூட, சான்றிதழுக்கு விண்ணப்பிக்கலாம். புதிய இணைய தளத்தில் தங்களுடைய பெயர் மற்றும் கடவுச் சொல்லை பதிவு செய்ய வேண்டும். மேலும் பான் அட்டை எண், இ-மெயில் முகவரி, செல்போன் எண் ஆகியவை அடிப்படையாக தேவைப்படுகிறது. அவற்றைப் பதிவு செய்த பிறகு, பெயர் மற்றும் கடவுச் சொல்லைப் பயன்படுத்தி தங்களுக்கென உருவாக்கப்பட்ட வணிகவரி இணையதள கணக்கிற்குள் உள் நுழைந்து, ஆன்லைன் படிவத்தை பூர்த்தி செய்ய வேண்டும். மேலும் தேவையென குறிப்பிடப்பட்டுள்ள ஆவணங்களின் நகல்களை ஆன்லைனில் பதிவேற்றம் செய்ய வேண்டும்.

ஆன்லைன் விண்ணப்பத்தைப் பூர்த்தி செய்து, பிறகு தேவையான ஆவணங்களின் நகல்களைப் பதிவேற்றம் செய்த பிறகு, விண்ணப்பத்தினை பிரிண்ட் எடுத்து, அதில் கையெழுத்திட்டு, சம்பந்தப்பட்ட பகுதியின் வணிக வரித்துறை அலுவலகத்தில் அதனைச் சமர்ப்பிக்க வேண்டும். அதனை துறை அலுவலர்கள் சரிபார்த்து அனைத்தும் சரியாக இருந்தால் பதிவுச் சான்றிதழை ஆன்லைன் மூலம் விண்ணப்பதாரரின் இ-மெயில் முகவரிக்கு அனுப்பி வைப்பார்கள்.

இந்த எளிதான முறையைப் பின்பற்றி வணிகர்கள், தொழில்துறையினர் வணிகவரித்துறையின் கீழ் பதிவுச் சான்றிதழைப் பெறலாம்.

தமிழக அரசின் வணிக வரித்துறை புதிய இணைய தள முகவரி : https:ctd.tn.gov.in