வாயு தொந்தரவால் அவதியா?

வாயு தொந்தரவால் அவதிப்படுபவர்கள் சீரகம், பெருங்காயத்தைச் சம அளவு மோரில் கலந்து சிறிதளவு உப்பைச் சேர்த்து குடிக்கலாம்.

 நீர்வேட்கை தணியாமல் இருப்பவர்கள் இளநீரில் எலுமிச்சம் பழச்சாற்றை பிழிந்து, குடித்து வந்தால் தாகம் தீரும்.

திடீரென வாந்தி எடுத்தால், எலுமிச்சைப் பழத்துடன் சர்க்கரையைச் சேர்த்து குடிக்க, வாந்தி நிற்கும்.

வயிற்றுப் பொருமல் இரைச்சல் இருந்தால், கொஞ்சம் ஓமத்தை நீர்விட்டு கொதிக்க வைக்க வேண்டும். காப்பி டிகாஷனை போல் வடிகட்டி, அதில் கொஞ்சம் பால், சர்க்கரை கலக்கிச் சாப்பிட்டால் உடனே நிவாரணம் பெறலாம்.

சிறுநீர் கழிக்கச் சிரமப்படுபவர்கள் அடிக்கடி நிரம்பத் தண்ணீர் குடிக்க வேண்டும். எலுமிச்சம் பழச்சாறு கலந்து நீர் குடிப்பவர்களுக்கு தாராளமாக நீர் பிரியும். கர்ப்பிணிகளுக்கு இது மிகவும் உகந்தது.

கோடைக்காலங்களில் சிலநேரங்களில் உதட்டுச் சாயம் இளகிப் போய்விடும். அதுபோன்ற நேரத்தில் அதனை எடுத்து ஐஸ் பெட்டிக்குள் இரண்டு மணி நேரம் வைத்திருந்தால், அது உறைந்து உபயோகிக்கும் பதத்துக்கு வந்துவிடும்.

இரவு கட்டிலில் படுப்பவர்கள் அரை மணி நேரம் முன்னதாக, படுக்கும் அறையின் தரையைப் பெறுக்கி லேசாக நீர் தெளித்து அறையின் ஜன்னல் கதவுகளைத் திறந்துவைத்து, பேனையும் லேசாகப் பத்து நிமிடங்கள் சுழல விடவும். இதனால் அறையின் வெப்பம் சீராகும்.

 வெளியே கிளம்பும்போது, அருநெல்லிக்காய் ஒன்றிரண்டை வாயில் போட்டு மென்றால், நாக்கு உலர்ந்துபோகாமல் இருக்கும்.

பயத்தமாவு, கடலை மாவு, மஞ்சள் வேப்பிலை பொடி கலந்த பொடியை தேய்த்து மாலையில் குழந்தைகளைக் குளிப்பாட்டினால் இரவில் நன்கு தூங்கும் வேனல் கட்டிகள் வராது.

வெயில் நேரத்தில் பலருக்கு நீர்க்கடுப்பு வரும். நீர்க்கடுப்பு வந்தால் ஒரு டம்ளர் மோரில் எலுமிச்சை பழத்தைப் பிழிந்து சாப்பிடுங்கள். மோரில் இளநீர் சேர்த்துச் சாப்பிட்டாலும், நீர்க்கடுப்பு குணமாகும்.

மாங்காய்களை பிரஷர் குக்கரில் போட்டு வேகவைத்து, பின்னர் சாறு பிழிந்து எடுத்து அதனுடன் தண்ணீர், உப்பு, மிளகு, பொடி சேர்த்து பருகினால், உடல் சூடு குறையும்.