குருவிக்கு ஒரு கூடு!

கூடிக் குரலெழுப்பும் - சிட்டுக் 
குருவிகள் கூட்டத்தைத் 
தேடிப் பார்க்கின்றேன் - கண்ணில் 
தென்பட வேயில்லை

மின்னணுக் கதிர் வீச்சு - கேபிள் 
விண்ணுயர் கோபுரங்கள் 
சொன்னார் அறிவியலார் - குருவியைத்
துரத்தி விடுகிறதாம்!

ஊரைச் சுற்றி மாடி - வீடுகள் 
உயர்ந்து நிற்பதனால் 
கூரை வீடுகளும் - விரைவாய்க் 
குறைந்து போயினவே!

உத்திரம் வாரைகள்  - கூரையை
உயர்த்தும் கழி, கம்பம்
மொத்த மாகக் காணோம் - எனினும் 
முயன்றால் புதுமை வரும்

செயற்கைக் கூடுகளை - முயன்றே 
தேர்வோம் விதவிதமாய்
உயர்ந்த தளத்தடியில் - சிட்டுகள் 
உறைவிடம் காணட்டும்!

தானிய மணிகளையும் - கீழே 
தரையில் விசிறிடுவோம்
ஏனினி சந்தேகம்? - சிட்டுகள் 
இனமும் பெருகிவிடும்!