பூனை சவாரி

யானைக்குட்டி பூனைக்குட்டி
இரண்டும் நண்பராம்
யானை முதுகில் பூனைக்குட்டி
சவாரி போகுமாம்

ஆற்றில் இறங்க பூனை பயந்து
கரையில் நிற்குமாம்
யானை குளித்து திரும்பும் வரையில்
காத்துக் கிடக்குமாம்

தும்பிக்கையைப் பிடித்துக் கொண்டு
பூனை நடக்குமாம்
பூனை வாலை பிடிக்க முயன்று
யானை தோற்குமாம்

ஓடிப் பிடித்து ஆடும் ஆட்டம்
இரண்டும் ஆடுமாம்
ஓட்டத்திலே பூனையிடம் 
யானை தோற்குமாம்

பூனை மேலே சவாரி செய்ய
யானை விரும்புச்சாம்
யானை ஆசை கேட்ட பூனை
மயங்கி விழுந்துச்சாம்!