பேய் கதையாக "டிக் டாக்'

ஃபேன் மேட் பிக்சர்ஸ் நிறுவனத்தின் தயாரிப்பில் உருவாகி வரும் படம் "டிக் டாக்'. "மூடர்கூடம்' ராஜாஜி, சுஷ்மா ராஜ்,பிரியங்கா மோகன், சாம்ஸ், முருகானந்தம், வினோதினி, நமோ நாராயணன் உள்ளிட்டோர் நடிக்கின்றனர்.

"எங்கிட்ட மோதாதே' படத்தை இயக்கிய ராமு செல்லப்பா இந்தப் படத்தின் கதையை எழுதுகிறார். மதன் எழுதி, இயக்குகிறார். படம் குறித்து இயக்குநர் பேசும் போது.... "" மிகப்பெரிய மால் ஒன்றில் பேய் வீடு செட் அமைத்து பார்வையாளர்களுக்கு த்ரில் வழங்கும் வேலையைச் செய்து வருகின்றனர் நாயகனும் நாயகியும். இந்த வீட்டில் நிஜமான பேய் ஒன்று நுழைவதும் அதன்பின் நடக்கும் நிகழ்வுகளையும் காமெடி, த்ரில் என கலந்து படமாக்கி வருகிறோம்.

பேய் உருவானதற்கான பின்னணி இதுவரை சொல்லப்படாத ஒன்றாக இருக்கும். ராஜாஜி இந்தப் படத்தில் இரண்டு வேடங்களில் நடிக்கிறார். அதில் இன்று வில்லன் கதாபாத்திரம். யாருமே நடிக்கத் தயங்கும் அந்த கதாபாத்திரத்தில் வித்தியாசமான தோற்றத்தில் துணிச்சலாக நடிக்கிறார் ராஜாஜி. இதற்காக மொட்டை அடித்துள்ளார். இளைஞர்களிடம் இருந்து பிரிக்கமுடியாமல் இரண்டற கலந்திருந்த, டிக்டாக் செயலி போல, கமர்ஷியலான அம்சங்களுடன் இந்தப்படம் உருவாகி இருப்பதால் "டிக்டாக்' என்றே தலைப்பு வைக்கப்பட்டுள்ளது. இசையமைப்பாளர் ஏ.கே.ரிஷால் சாய். "ராட்சசன்' படத்திற்குப் படத்தொகுப்பு செய்த ஷான் லோகேஷ் இந்தப் படத்திலும் தனது கைவண்ணத்தைக் காட்டியுள்ளார். படப்பிடிப்பு முழுவதுமாக கோவையில் நடத்தப்பட்டுள்ளது. மார்ச் வெளியீடாகப் படம் திரைக்கு வரவுள்ளது'' என்றார் இயக்குநர்.