வசூல் சாதனையில் முதலிடம்

2023-ஆம் ஆண்டில் ஷாருக்கான் பாக்ஸ் ஆபிஸில் ஹாட்ரிக் சாதனை படைத்திருக்கிறார். "பதான்'- 1050.30 கோடி ரூபாய் வசூலித்தது. "ஜவான்'- 1148.32 கோடி ரூபாய் வசூலித்தது. ஆண்டு இறுதியில் வெளியான "டங்கி' உலகம் முழுவதும் 400 கோடி ரூபாய்க்கு மேல் வசூலித்திருக்கிறது. ஒரே வருடத்தில் பிளாக்பஸ்டர் ஹிட்டுகளை ஷாருக்கான் தொடர்ந்து வழங்கி இருக்கிறார். 

அவரின் நடிப்பில் வெளியான இந்த மூன்று படங்களும் இணைந்து 2023ஆம் ஆண்டில் உலகளாவிய பாக்ஸ் ஆபிஸில் 117 மில்லியன் டாலர்களை வசூலித்திருக்கிறது. இது சீனாவை தவிர்த்து பாரம்பரிய சர்வதேச சந்தைகளில் ஒரே ஆண்டில் எந்த இந்திய சூப்பர் ஸ்டாரும் அடையாத மிகப் பெரும் சாதனையாகும்.  இதன் மூலம் இந்தியாவில் மட்டுமல்ல.

உலகளவிலான திரைத்துறைக்கு புதிய வரையறைகளையும் ஏற்படுத்தி உள்ளது. ஷாருக்கான் இந்த ஆண்டில் "பதான்' மூலம் உளவாளிகளின் உலகத்தை பிரம்மாண்டமாக ரசிகர்களுக்கு வழங்கினார். அதைத்தொடர்ந்து "ஜவான்' படத்தில் அதிரடியான ஆக்ஷன் காட்சிகளை வழங்கி ரசிகர்களை பரவசப்படுத்தினார்.

பின்னர் அவரது நடிப்பில் "டங்கி' வெளியானது. கிறிஸ்துமஸ் கொண்டாட்டத்தின் போது ஐரோப்பாவின் மிகப்பெரிய திரையரங்கமான லு கிராண்ட்  ரெக்ஸில் "டங்கி' திரையிடப்பட்டது. இத்திரையரங்கில் திரையிடப்பட்ட முதல் ஹிந்தி திரைப்படம் என்ற பெருமையையும் இப்படம் பெற்றது.