கையில் சாட்டையுடன் பால ஐயனார்!

ராஜராஜ சோழன் காலத்திலிருந்து மராட்டிய அரசர்கள் தஞ்சையை ஆண்ட காலம் வரை புகழ்பெற்று விளங்கிய திருத்தலம், திருவாரூர் மாவட்டம், குடவாசல் வட்டம், கண்டரமாணிக்கம் கிராமம் ஆகும். 

இவ்வூரில் ஸ்ரீகோதண்டராம சுவாமி திருக்கோயிலுக்கு அருகே உள்ளது ஸ்ரீபால ஐயனார் திருக்கோயில். இக்கோயிலில் பால ஐயனார் கையில் சாட்டை ஏந்தியபடி பக்தர்களுக்கு அருள்பாலித்து வருகிறார்.  

மராட்டிய மன்னர் சாஜியின் அரசவையில் சிறந்த சம்ஸ்கிருத பண்டிதராக விளங்கிய கண்டர மாணிக்கம் ஸ்ரீராமபத்ர தீட்சிதர் இவ்வூரைச் சேர்ந்தவர். இவரெழுதிய நூல்கள் தஞ்சை சரஸ்வதி மஹால் நூலகத்தில் உள்ளன.

36 அறங்களையும் பரிபூர்ணமாக அனுசரித்து மாணிக்கமாகத் திகழ்ந்த ஊராக இருந்ததால் "கண்டர(ற) மாணிக்கம்' என அழைக்கப்பட்டது. 

அத்தகைய பெருமை மிக்க இத்தலத்திலுள்ள ஸ்ரீபால ஐயனார் திருக்கோயில் 5-ஆம் ஆண்டு சம்வத்ஸராபிஷேகம் நாளை (பிப். 6) சிறப்பு பூஜை, ஹோமங்களுடன் விமரிசையாக நடைபெறுகிறது. கும்பகோணம் - நன்னிலம் - நாகப்பட்டினம் பேருந்து வழித்தடத்தில் பிலாவடி பேருந்து நிலையத்திற்கு அருகில் உள்ளது கண்டரமாணிக்கம் கிராமம்.

மேலும் தகவல்களுக்கு: வி.ரமேஷ் - 9443748915.