அமெரிக்காவுடன் பேச்சு: உறுதி செய்தது தலிபான்

அமெரிக்காவுடன் பேச்சுவார்த்தை நடத்தியதை தலிபான் பயங்கரவாத அமைப்பினர் உறுதிப்படுத்தியுள்ளனர்.
இதுகுறித்து தலிபான் செய்தித் தொடர்பாளர் ஸபியுல்லா முஜாஹித் (படம்) கூறியதாவது:
ஆப்கன் விவகாரம் குறித்து அமெரிக்க அதிகாரிகளுடன் பேச்சுவார்த்தை நடத்தியது உண்மைதான். எனினும், அது வெறும் பூர்வாங்க பேச்சுவார்த்தையே ஆகும்.
அந்தப் பேச்சுவார்த்தையில் எந்த உடன்பாடும் எட்டப்படவில்லை என்றார் அவர்.
முன்னதாக, அமெரிக்கப் பிரதிநிதி ஸல்மே கலீல்ஸாதுடன் ஆப்கன் தலிபான் பயங்கரவாத அமைப்பின் பிரதிநிதிகள் கத்தாரில் அமைதிப் பேச்சுவார்த்தை நடத்தியதாக தகவல்கள் வெளியாகின.
அமெரிக்கப் படையெடுப்புக்குப் பிறகும், ஆப்கானிஸ்தானில் இன்னும் சுமார் பாதி இடங்கள் தலிபான்களின் கட்டுப்பாட்டில் இருப்பது குறிப்பிடத்தக்கது.