பாகிஸ்தானின் புதிய வெளியுறவுத்துறை அமைச்சராகிறார் பிலாவல் புட்டோ. அடுத்த இரண்டு நாள்களில், இவர் அமைச்சராக பொறுப்பேற்பார் என எதிர்பார்க்கப்படுகிறது.
லண்டனில் செய்தியாளர்களை சந்தித்த பாகிஸ்தான் பிரதமரின் காஷ்மீர் விவகாரங்களுக்கான ஆலோசகர் கமர் ஜமான் கைரா, இதகுறித்த அறிவிப்பை வெளியிட்டார். இது தொடர்பாக பாகிஸ்தான் செய்தியாளர் ஒருவர் வெளியிட்ட ட்விட்டர் பதிவில், அடுத்த இரண்டு நாள்களுக்குள் பிலாவல் பொறுப்பேற்பார் என கைரா கூறியுள்ளார்.
இந்த முடிவு கொள்கை சார்ந்து எடுக்கப்பட்டுள்ளதாகவும், பிலாவல் அமைச்சராக பொறுப்பேற்பதற்கு எந்த தடையும் இல்லை என்றும் அவர் விளக்கம் அளித்துள்ளார்.
பாகிஸ்தான் பிரதமர் ஷெபாஸ் ஷெரீப் தலைமையிலான கூட்டணி அரசில் இரண்டாவது பெரிய கட்சியாக பாகிஸ்தான் மக்கள் கட்சி திகழ்கிறது. கடந்த ஏப்ரல் 11ஆம் தேதி, 342 நாடாளுமன்ற உறுப்பினர்களில் 174 உறுப்பினர்களின் ஆதரவோடு பாகிஸ்தான் பிரதமராக ஷெபாஸ் ஷெரீப் தேர்ந்தெடுக்கப்பட்டார்.
முன்னதாக, தேசிய நாடாளுமன்றத்தில் இம்ரான் கான் அரசுக்கு எதிராக எதிர்க்கட்சிகளை ஒருங்கிணைத்து நம்பிக்கையில்லா தீர்மானத்தை ஷெபாஸ் கொண்டு வந்தார்.