ரஷிய ராணுவத்தில் பணிபுரிந்து வரும் இந்தியா்களை மீட்டுவர முழு முயற்சி: வெளியுறவு அமைச்சகம்

‘உக்ரைனுடனான போரில் ரஷிய ராணுவத்துக்காக பணிபுரிந்து வரும் இந்தியா்களை முன்கூட்டியே விடுவித்து, தாயகம் அழைத்து வருவதற்கான அனைத்து முயற்சிகளையும் இந்தியா மேற்கொண்டு வருகிறது’ என மத்திய வெளியறவுத் துறை செய்தித் தொடா்பாளா் ரண்தீா் ஜெய்ஸ்வால் வியாழக்கிழமை தெரிவித்தாா். ரஷிய ராணுவத்தில் துணைப் பணிகளில் ஈடுபட்டுள்ள இந்தியா்கள், தற்போது உக்ரைன் போா் பகுதியில் உயிருக்கு ஆபத்தான நிலையில் பணியாற்றி வருவதாக ஊடகங்களில் செய்திகள் வெளியாகின. இதையொட்டி, ‘இந்தியப் பணியாளா்களை மீட்டு தாயகம் அழைத்துவர வெளியுறவு அமைச்சகம் நடவடிக்கை எடுக்க வேண்டும்’ என்று அகில இந்திய மஜ்லிஸ் கட்சித் தலைவா் அசாதுதீன் ஒவைசி ‘எக்ஸ்’ பதிவில் கோரிக்கை விடுத்திருந்தாா். இதுதொடா்பாக வெளியுறவு அமைச்சகம் வெளியிட்ட செய்திக்குறிப்பில், ‘மாஸ்கோவ் நகரிலுள்ள இந்திய தூதரகம் இது குறித்த தகவல்களை ரஷிய அதிகாரிகளின் கவனத்துக்கு கொண்டு சென்றுள்ளது. இந்தியப் பணியாளா்களை முன்கூட்டியே விடுவிப்பது தொடா்பாக அந்நாட்டு அதிகாரிகளுடன் இந்தியா தொடா்ந்து பேசி வருகிறது’ எனத் தெரிவித்தது. இந்நிலையில், தில்லியில் செய்தியாளா்களிடம் வியாழக்கிழமை பேசிய மத்திய வெளியுறவு அமைச்சக செய்தித் தொடா்பாளா் ரண்தீா் ஜெய்ஸ்வால் கூறுகையில் ‘இந்திய பணியாளா்களை முன்கூட்டியே விடுவித்து, தாயகம் அழைத்து வருவதற்கான அனைத்து முயற்சிகளையும் இந்தியா மேற்கொண்டு வருகிறது’ என்றாா். அதேபோல், கத்தாரில் இஸ்ரேலுக்கு உளவு பாா்த்த குற்றச்சாட்டில் மரண தண்டனை விதிக்கப்பட்டு, பின்னா் விடுதலை செய்யபட்ட இந்திய முன்னாள் கடற்படை அதிகாரிகளில் இன்னும் நாடு திரும்பாத கமாண்டா் புரேந்து திவாரி, சில நடைமுறைகளை பூா்த்தி செய்த பிறகு விரைவில் நாடு திரும்புவாா் என ரண்தீா் ஜெய்ஸ்வால் தெரிவித்தாா்.