பிரான்ஸில் புதிதாக பொறுப்பேற்றுள்ள பிரதம அமைச்சரின் தலைமையிலான முதல் அமைச்சரவை கூட்டம் நடைபெற்றுள்ளது.
கூட்டத்தில் தனது ஒற்றைக் குறிகோளாக அவர் முன்வைத்துள்ளது ‘செயல், செயல், செயல்’ என அதிபரின் அலுவலகம் வெளியிட்ட செய்திக் குறிப்பில் தெரிவித்துள்ளது.
கேப்ரியல் அட்டல், 34 வயதான இவர், பிரான்ஸ் வரலாற்றிலேயே மிக இளைய பிரதமர் மற்றும் வெளிப்படையாக தன்பாலின ஈர்ப்பாளராக அறிவித்துக் கொண்ட முதல் பிரதமர்.
கேப்ரியல் தலைமையிலான அமைச்சரவையில் 14 அமைச்சர்கள் கூடியுள்ளனர். புதிய அரசு இன்னும் 10 நாட்களில் கூடுதல் இணை அமைச்சர்களுடன் பொறுப்பேற்கவுள்ளது.
வழக்கமாக 30 முதல் 40 அமைச்சர்கள் பிரான்ஸ் அவையில் இடம்பெறுவர். புதிய முகங்களோடு அமைக்கப்பட்ட அமைச்சரவை புத்துணர்வோடு ஏற்கெனவே உள்ள சில அமைச்சர்களுடன் அமைவதாக அதிபர் இமானுவேல் மேக்ரானின் அலுவலகம் தெரிவித்துள்ளது.
இந்த ஆண்டில் கவனம் செலுத்த வேண்டிய விஷயங்களைக் குறித்து அதிபர் மேக்ரான், அடுத்த வாரம் நாடாளுமன்றத்தில் நிகழ்த்தவுள்ள உரையில் குறிப்பிடவுள்ளதாகத் தெரிவிக்கப்பட்டுள்ளது.
இதையும் படிக்க: ஹமாஸ் கையில் வாளைக் கொடுக்காதீர்கள்: இஸ்ரேல்
அட்டல் தலைமையிலான அமைச்சரவை மிகவும் திறன் வாய்ந்ததாகவும் முடிவுகளை துரிதமாக பெறும்வகையிலும் சிறியதாக அமைந்துள்ளதாக மேக்ரான் அலுவலகம் தெரிவித்துள்ளது.