ஸ்பெயினில் 69 பேர் பலியான ரயில் விபத்து: போக்குவரத்து அமைச்சர் ராஜிநாமா!

ஸ்பெயினில் நடந்த கோர ரயில் விபத்துக்குப் பொறுப்பேற்று, அந்நாட்டின் போக்குவரத்து அமைச்சர் ஆஸ்கார் புவென்டே தனது பதவியை ராஜிநாமா செய்துள்ளார்.

ஸ்பெயின் நாட்டின் மத்திய மாகாணமான டோலெடோவில், கடந்த வாரம் புதன்கிழமை (அக். 28) காலை மாட்ரிட் நகரத்தில் இருந்து செவில் நோக்கிச் சென்ற அதிவேக ரயில் ஒன்று நின்று கொண்டிருந்த மற்றொரு ரயிலில் மோதி விபத்துக்குள்ளானது.

இந்த விபத்தில், ரயிலின் 2 பெட்டிகள் தடம்புரண்ட நிலையில், அந்த ரயில்களில் பயணித்த சுமார் 69 பேர் பலியாகினர்.  சுமார் 200 பேர் காயமடைந்து மருத்துவமனையில் சிகிச்சைப் பெற்று வருகின்றனர்.

ஸ்பெயினில் ஓராண்டில் நேரிட்ட இரண்டாவது ரயில் விபத்து சம்பவம் இதுவாகும். இந்த ரயில் விபத்துக்கு குறித்து ஸ்பெயின் நாடாளுமன்றத்தில் அமைச்சர் ஆஸ்கார் விளக்கம் அளித்தார்.

அப்போது அவர் பேசுகையில், “ஓராண்டுக்கும் குறைவான காலத்தில் இரண்டு கோர ரயில் விபத்துகள் நடந்த பின்னர், ஒரு நாட்டின் போக்குவரத்து அமைச்சர் பதவியில் நீடிக்க முடியாது” என்று தெரிவித்து விபத்துக்குப் பொறுப்பேற்று, போக்குவரத்து அமைச்சர் ஆஸ்கார் தனது பதவியை ராஜிநாமா செய்துள்ளார்.

அதுமட்டுமின்றி, நவ. 29 அன்று நடைபெறவிருக்கும் பொதுத் தேர்தலில் போட்டியிடப் போவதில்லை என்றும், வல்லாடோலிட் தொகுதியில் ஸ்பானிய சோசலிஸ்ட் தொழிலாளர் கட்சி சார்பில் தான் தாக்கல் செய்த வேட்புமனுவையும் திரும்பப் பெறுவதாக ஆஸ்கார் புவென்டே உறுதிப்படுத்தியுள்ளார்.