லஞ்சம் பெற்ற பேரூராட்சி சுகாதார ஆய்வாளர் கைது

தண்ணீர் குழாய்களை பழுது பார்க்கும் உரிமத்தை புதுப்பிக்க லஞ்சம் பெற்ற பேரூராட்சி சுகாதார ஆய்வாளரை லஞ்ச ஒழிப்புப் படையினர் கைது செய்தனர்.
கர்நாடக மாநிலம், கோலார் மாவட்டம், பாங்காரு பேட்டை அமராவதி லேஅவுட்டைச் சேர்ந்தவர் சீனிவாச பிரசாத். இவர் பேரூராட்சிக்குள்பட்ட பகுதிகளில் தண்ணீர் குழாய்களை பழுது பார்க்கும் உரிமம் பெற்றிருந்தாராம். இந்நிலையில், உரிமத்தை புதுப்பிக்க பாங்காரு பேட்டை பேரூராட்சி சுகாதார ஆய்வாளர் சுப்பிரமணி, ரூ.5 ஆயிரத்தை லஞ்சமாக கேட்டாராம். திங்கள்கிழமை ரூ.2,600 முன்பணமாக சுப்பிரமணியிடம் சீனிவாஸ் பிரசாத் வழங்கிய போது, மறைந்திருந்த லஞ்ச ஒழிப்புப் படையினர் அவரை கைது செய்தனர். கைது செய்யப்பட்ட சுப்பிரமணியிடம் கோலார் லஞ்ச ஒழிப்புப் படை போலீஸார் விசாரணை மேற்கொண்டுள்ளனர்.