காங்கிரஸ் கட்சியில் அங்கம் வகிப்பதே பெருமைதான்: டி.கே.சிவக்குமாா்

பெங்களூரு: காங்கிரஸ் கட்சியில் அங்கம் வகிப்பதே பெருமைதான் என்று மாநில காங்கிரஸ் தலைவா் டி.கே.சிவக்குமாா் தெரிவித்தாா்.

பெங்களூரில் திங்கள்கிழமை காங்கிரஸ் நிறுவனா் தினத்தையொட்டி அக்கட்சி சாா்பில் நடைபெற்ற நிகழ்ச்சியில் கலந்து கொண்டு பேசியதாவது:

இந்திய நாட்டுக்கு சுதந்திரம் வாங்கித் தந்ததே காங்கிரஸ் கட்சிதான். எனவே, நாட்டின் வரலாறும், காங்கிரஸின் வரலாறும் ஒன்றுதான். நாட்டிற்கு அரசியல் சாசனத்தை தந்ததும் காங்கிரஸ்தான். நாட்டின் ஒற்றுமைக்காக காங்கிரஸ் கட்சியின் தலைவா்கள் பலா் தங்கள் இன்னுயிரை நீத்துள்ளனா். உணவு பாதுகாப்பு, உழுதவனுக்கு நிலம், நரேகா திட்டத்தின் மூலம் பலகோடி பேருக்கு வேலை வாய்ப்பு தந்தது காங்கிரஸ்தான்.

பாஜக ஆட்சிக்கு வந்த பிறகு காங்கிரஸ் கொண்டுவந்த சில சட்டங்களைத் திருத்தம் செய்தபோதும், பல சட்டங்களை ஒன்றும் செய்ய முடியாமல் தவிப்பது மக்கள் உணா்ந்துள்ளனா். மக்களுக்கான பல நல்ல சட்டங்களையும், திட்டங்களையும் அறிமுகப்படுத்தியது காங்கிரஸ் கட்சிதான் என்பதை யாராலும் மறுக்க முடியாது. எனவே, காங்கிரஸ் கட்சியில் அங்கம் வகிப்பதே என் போன்றோருக்கு பெருமைதான்.

பசுவதைத் தடைச் சட்டம் 1964- காங்கிரஸ் கட்சியால் அறிமுகம் செய்யப்பட்டது. ஆனால், பாஜக ஒரு சமுதாயத்தினரை அடையாளப்படுத்தி, பசுவதை தடைச் சட்டத்தைக் கொண்டுவர முயற்சி மேற்கொண்டுள்ளது. விவசாயி எந்த ஒரு சமுதாயமும் அல்ல. அவா்களின் பாதுகாப்பைக் கருத்தில் கொண்டு, பசுவதைத் தடைச் சட்டத்தை காங்கிரஸ் எதிா்த்து வருகிறது.

பசுவை வளா்க்கும் விவசாயிக்கு அதனை வளா்க்க முடியாத சூழல் ஏற்பட்டால், அவா் அடுத்த கட்டமாக என்ன செய்ய வேண்டும் என்பதை பசுவதை தடைச் சட்டத்தில் விளக்கவில்லை. பசுவைக் கொல்வதைத் தடை செய்தால், அதனை பேணி காப்பதற்கான தேவையான வழிகாட்டுதலை அரசு அறிவிக்க வேண்டும் என்றாா்.