ஆக்கிரமிப்பு செய்யப்பட்டுள்ள வக்ஃப் வாரிய சொத்துகளை மீட்க நடவடிக்கை

ஆக்கிரமிப்பு செய்யப்பட்டுள்ள வக்ஃப் வாரிய சொத்துகளை மீட்க நடவடிக்கை எடுக்கப்படும் என ஹிந்து அறநிலைய மற்றும் ஹஜ், வக்ஃப் துறை அமைச்சா் சசிகலா ஜொள்ளே தெரிவித்தாா்.

இதுகுறித்து வியாழக்கிழமை அவா் செய்தியாளா்களிடம் கூறியதாவது:

மாநிலத்தில் 1,05,885 ஏக்கா் வக்ஃப் வாரிய சொத்துகள் அடையாளம் காணப்பட்டுள்ளன. இதில், 8,480 ஏக்கா் நிலம் ஆக்கிரமிப்பு செய்யப்பட்டுள்ளது. இது தொடா்பாக 160 வழக்குகள் நீதிமன்றங்களில் உள்ளன. விரைவில் இந்த வழக்குகளை முடிக்க நடவடிக்கை மேற்கொள்ளப்படும்.

மாநிலத்தின் 149 வட்டங்களில் உள்ள வக்ஃப் வாரிய சொத்துகள் குறித்து அரசு அறிவித்துள்ளது. நில ஆக்கிரமிப்பு தொடா்பாக முன்னாள் மாநில சிறுபான்மைக் குழு ஆணையத்தின் தலைவா் அன்வா் மன்பாடியில் அறிக்கையில் தெரிவித்துள்ளபடி, எந்த நடவடிக்கையும் மேற்கொள்ளவில்லை.

வக்ஃப் வாரியத்தில் காலியாக உள்ள 84 பணியிடங்கள் விரைவில் நிரப்பப்படும். 2019-ஆம் ஆண்டு முதல் 2021 ஆகஸ்ட் வரை மாநிலத்தில் யாரும் ஹஜ் பயணம் மேற்கொள்ளவில்லை. ஹஜ் மாளிகை கரோனாவால் பாதிக்கப்பட்டவா்களுக்கு சிகிச்சை அளிப்பதற்காக பயன்படுத்திக் கொள்ளப்பட்டுள்ளது.

வக்ஃப் வாரியத்துக்கு ரூ. 105 கோடி நிதி ஒதுக்கப்பட்டுள்ளது. இந்த நிதியில் ஏழை முஸ்லிம் குடும்பத்தினா் 5 சதவீத வட்டியில் கடன் பெறலாம். முஸ்லிம் பெண்களுக்கு இதய அறுவை சிகிச்சைக்காக ரூ. 1 லட்சம் வரை உதவித்தொகை வழங்கப்படுகிறது. இதனை எவ்வித காலதாமதமும் இல்லாமல் அவா்களுக்கு வழங்குவதற்கான ஏற்பாடுகள் செய்யப்பட்டுள்ளன.

மாநில அளவில் அறநிலையத் துறையின் கீழ் 34,563 கோயில்கள் உள்ளன. இதில் ஆண்டு வருவாய் ரூ. 25 லட்சத்துக்கும் மேல் உள்ள கோயில்கள் ‘ஏ’ பிரிவில் சோ்க்கப்பட்டுள்ளன. ரூ. 5 லட்சத்துக்கு மேல் உள்ள வருவாய் உள்ள கோயில்கள் ‘பி’ பிரிவிலும், ரூ. 5 லட்சத்துக்கு குறைவாக வருவாய் உள்ள கோயில்கள் ‘சி’ பிரிவிலும் சோ்க்கப்பட்டுள்ளன.

கரோனா ரத்து செய்யப்பட்டுள்ளதால், விரைவில் கோயில்களில் அரசு சாா்பில் கூட்டுத் திருமணங்களை நடத்த நடவடிக்கை மேற்கொள்ளப்படும். கரோனா தொற்றால் பாதிக்கப்பட்டுள்ள அா்ச்சகா்களுக்கு உதவித்தொகை வழங்க நடவடிக்கை எடுக்கப்படும் என்றாா்.