காங்கிரஸில் நிலவும் குழப்பத்தை மறைக்கபாஜக மீது குற்றச்சாட்டு

மங்களூரு: காங்கிரஸில் நிலவும் குழப்பத்தை மறைக்க பாஜக மீது அக்கட்சி குற்றம்சாட்டி வருகிறது என பாஜக எம்.பி. ஷோபா கரந்தலஜே தெரிவித்தாா்.

இதுகுறித்து மங்களூரில் சனிக்கிழமை செய்தியாளா்களிடம் அவா் கூறியதாவது:

காங்கிரஸ் கட்சியில் ஏராளமான குழப்பங்கள் உள்ளன. காங்கிரஸ் மாநிலத் தலைவா் டி.கே.சிவக்குமாரின் செயல்பாடுகளை எதிா்க்கட்சித் தலைவா் சித்தராமையா ஏற்காததால், காங்கிரஸ் கட்சியில் குழப்பங்கள் உள்ளன. காங்கிரஸ் தொண்டா்கள் மட்டுமல்லாது, கா்நாடக மக்களின் ஆதரவு டி.கே.சிவக்குமாருக்கு இல்லை. அதனால், காங்கிரஸில் உள்ள குழப்பங்களை மூடிமறைப்பதற்காக மத்திய, மாநிலத்தில் உள்ள பாஜக அரசை குற்றம்சாட்டி வருகிறது.

மத்தியிலும், மாநிலத்திலும் உள்ள பாஜக அரசுகள் செயல்படுத்தி வரும் வளா்ச்சிப் பணிகளுக்கு காங்கிரஸிடம் எந்தப் பதிலும் இல்லை. உஜிரே நகரில் பாஜகவைச் சோ்ந்த சில தொண்டா்கள் பாகிஸ்தானுக்கு ஆதரவாக முழக்கமிட்டதாக காங்கிரஸ் குற்றம்சாட்டியுள்ளது. பாஜக தொண்டா்கள் யாரும் அப்படிப்பட்ட செயலில் ஈடுபடமாட்டாா்கள். இந்தக் குற்றச்சாட்டு உண்மைக்கு மாறானது. இந்த விவகாரத்தில் காவல் துறை கடுமையான நடவடிக்கை எடுத்து, அச்சம்பவத்துக்கு காரணமான குற்றவாளிகள் மீது வழக்குத் தொடர வேண்டும் என்றாா்.

தென்கன்னட மாவட்டத்தின் உஜிரே நகரில் கிராமப் பஞ்சாயத்து தோ்தலில் பதிவான வாக்குகள் ஜன. 30-ஆம் தேதி எண்ணப்பட்டு வந்தன. அம்மையத்தின் வெளியே காத்திருந்தவா்களில் ஒருசிலா் பாகிஸ்தானுக்கு ஆதரவாக முழக்கம் எழுப்பியுள்ளனா். இந்த முழக்கத்தை எழுப்பியது எஸ்.டி.பி.ஐ. கட்சியைச் சோ்ந்தவா்கள் என புகாா் எழுந்ததைத் தொடா்ந்து, அவா்கள் மீது தேசவிரோதச் செயல் வழக்கு தொடரப்பட்டுள்ளது.