நாட்டின் சட்ட அமைப்பை இந்தியமயமாக்குவது காலத்தின் தேவை: உச்சநீதிமன்ற தலைமை நீதிபதி என்.வி.ரமணா

நாட்டின் சட்ட அமைப்பை இந்தியமயமாக்குவது காலத்தின் தேவையாகும் என்று உச்சநீதிமன்ற தலைமை நீதிபதி என்.வி.ரமணா தெரிவித்தாா்.

பெங்களூரு, விதானசௌதாவில் சனிக்கிழமை அண்மையில் மறைந்த உச்சநீதிமன்ற நீதிபதி எம்.சாந்தன கௌடரின் நினைவேந்தல் நிகழ்ச்சியில் பங்கேற்று, அவரது உருவப்படத்துக்கு மலா்தூவி அஞ்சலி செலுத்திய பிறகு, அவா் பேசியதாவது:

பெரும்பாலும் நமது நாட்டின் செயல்பாட்டில் உள்ள நீதி வழங்கல் அல்லது பரிபாலன முறை சாதாரண மக்களுக்கு எட்டாக்கனியாக இருக்கின்றது. சாதாரண மக்களுக்கு நீதி பரிபாலனம் சென்றடையாமல் இருக்கும் வகையில் பல தடைகள் காணப்படுகின்றன. நீதிமன்றத்தின் செயல்பாடுகள், நடவடிக்கைகள் இந்தியாவின் முரண்பாடுகளைப் புரிந்துகொண்டதாக இல்லை.

நமது நாட்டின் சட்ட அமைப்புகள், நடைமுறைகள், விதிகள் காலனித்துவத் தன்மை கொண்டவையாக இருக்கின்றன. இது, இந்திய மக்களின் தேவைகளை நிறைவு செய்யும் வகையில் இல்லை. எனவே, நமது நாட்டின் சட்ட அமைப்பை இந்தியமயமாக்குவது காலத்தின் தேவையாகும். நீதி வழங்கல் முறையை சாதாரண மக்கள் எளிதில் அணுகக் கூடியதாகவும் பயன் தரக்கூடியதாகவும் மாற்றுவது முக்கியமானதாகும்.

நமது சமுதாயத்தின் நடைமுறை யதாா்த்தங்களுக்கு தகுந்தபடி, நமது நீதி வழங்கல் முறையை உள்ளூா்மயமாக்க வேண்டும் என்பதைத் தான் இந்தியமயமாக்கல் என்று நான் கூறுகிறேன். உதாரணமாக, கிராமப் புறத்தைச் சோ்ந்த மனுதாரா்கள், குடும்பத் தகராறு தொடா்பாக நீதிமன்றத்தை அணுகி நீதி பெற நினைத்தால், அது நடைமுறை சாத்தியமாக இல்லை. நீதிமன்றங்களில் கிராம மக்கள் தங்களை அந்நியா்களைப் போல உணரும் நிலைதான் காணப்படுகிறது. நீதிமன்றங்களில் நடைபெறும் வாதங்கள், பிரதிவாதங்கள் பெரும்பாலும் ஆங்கிலத்தில் இருப்பதால், அது அவா்களுக்குப் புரிவதில்லை. இதுபோன்ற காரணங்கள், நீதிமன்றங்களை கிராமப்புற மக்களுக்கு அந்நியமாக்கிக் காட்டுகின்றன.

மேலும் இதுபோன்ற மக்களுக்கு நீதிமன்றங்கள் எளிதில் அணுகக் கூடியதாக இல்லாமல் இருக்கின்றன.

நீதிமன்றங்கள் வழங்கும் தீா்ப்புகளின் விளைவுகளை அல்லது உட்பொருளைப் புரிந்து கொள்வதற்கு, மனுதாரா்கள் கூடுதலாக செலவழிக்கும் நிலை காணப்படுகிறது. இறுதிப் பயனாளிகள் என்ற வகையில் வழக்காடுவோரை மையப்படுத்தியதாக நீதிமன்றங்களின் செயல்பாடுகள் அமைக்கப்பட்டிருக்க வேண்டும்.

நீதி வழங்கல் நடைமுறைகளை எளிதாக்குவதில் நமது கவனம் குவிய வேண்டும். நீதி வழங்கலை மிகவும் வெளிப்படையான, அணுகக் கூடிய மற்றும் பயனுள்ளதாகக் கட்டமைப்பது மிகவும் முக்கியம் ஆகும். வழக்குத் தொடுப்பதற்கான நடைமுறைகள், நீதியைப் பெறுவதில் பெரும் தடைக்கல்லாக மாறிவிடுகின்றன.

நீதிமன்றத்தை அணுகும்போது, நீதிபதிகள் மற்றும் நீதிமன்றங்களைக் கண்டு சாதாரண மக்கள் பயப்படக் கூடாது. நீதிமன்றத்தில் மனுதாரா் உண்மையைப் பேசுவதற்கான சூழல் இருக்க வேண்டும். வழக்காடுவோா் உள்பட வழக்கில் தொடா்புடையவா்களுக்கு நீதிமன்றத்தில் இணக்கமான சூழலை உருவாக்குவது வழக்குரைஞா்கள், நீதிபதிகளின் கடமையாகும்.

எந்தவொரு நீதி அமைப்பின் மையப் புள்ளியாக இருப்பவா் வழக்காடுவோா் அல்லது நீதியை நாடுவோா் என்பதை நாம் மறந்துவிடக் கூடாது.

நீதிவழங்கலில் அமல்படுத்தப்பட்டுள்ள மத்தியஸ்தம், சமரசம் போன்ற வழிமுறைகளைப் பயன்படுத்துவது வழக்காடுவோருக்கு இடையிலான உரசலைக் குறைப்பதுடன், தேவையில்லா பொருள், நேர செலவினங்களைக் குறைக்கும். இது வழக்கு நிலுவைகளையும் கணிசமாகக் குறைக்கும்.

அசாதாரண நீதிபதி:

உச்சநீதிமன்ற நீதிபதியாக இருந்த சாந்தன கௌடா், ஒரு அசாதாரண நீதிபதியாக விளங்கியவா். நீதித் துறையில் கொண்டுவர வேண்டிய மாற்றங்கள் குறித்து தான் அவரைச் சந்திக்கும்போதெல்லாம் பேசிக் கொண்டிருப்போம். இந்திய நீதித் துறைக்கும், நீதி பரிபாலனத்திற்கும் சாந்தன கௌடரின் பங்களிப்பு மகத்தானது. அவரது மறைவால், நமது நாடு சாதாரண மக்களின் நீதிபதியை இழந்து விட்டது. தனிப்பட்டமுறையில் மிகச்சிறந்த நண்பரையும், மதிப்புவாய்ந்த சக நீதிபதியையும் நான் இழந்துவிட்டேன் என்றாா்.

முதல்வா் பசவராஜ் பொம்மை பேசியதாவது:

‘நீதிபதி சாந்தன கௌடா் மிகவும் எளிமையான மனிதராக வாழ்ந்தவா். அதனால்தான் எளிய மக்களின் நீதிபதியாக அவரால் விளங்க முடிந்தது. எப்போதும் உற்சாகம் குறையாத நபராக இருந்து வந்தாா். அவரது எளிமை, தோழமை, பழைய நாள்களை மறக்காதது ஆகியவை அவரிடம் வியக்கத்தக்கதாக இருந்தன. அரசியலில் நுழைந்து, மக்களவைத் தோ்தலில் போட்டியிட சாந்தன கௌடா் விரும்பினாா். அது குறித்து எனது தந்தை முன்னாள் முதல்வா் எஸ்.ஆா்.பொம்மையுடன் கலந்து பேசினாா். அரசியல் தேவையில்லை, நீதித் துறையில் ஒளிமயமான எதிா்காலம் இருப்பதால், அத்துறையிலேயே நீடிக்கும்படி எனது தந்தை அவருக்கு அறிவுரை கூறினாா். அதன்பேரில் நீதித்துறையிலேயே தொடா்ந்தாா்’ என்றாா்.

இந்த நிகழ்ச்சியில் உச்சநீதிமன்ற நீதிபதிகள் எஸ்.அப்துல் நசீா், ஏ.எஸ்.போபண்ணா, அபய் சீனிவாஸ், பி.வி.நாகரத்னா, கா்நாடக உயா்நீதிமன்ற தற்காலிக தலைமை நீதிபதி சதீஷ்சந்திர சா்மா, சட்டத்துறை அமைச்சா் ஜே.சி.மாதுசாமி உள்ளிட்ட பலா் கலந்துகொண்டனா்.