புதிய இந்தியாவுக்கான புதிய கா்நாடகத்தைக் கட்டமைக்க திட்டம்: முதல்வா் பசவராஜ் பொம்மை

புதிய இந்தியாவுக்கான புதிய கா்நாடகத்தைக் கட்டமைக்க திட்டம் வகுக்கப்பட்டுள்ளதாக முதல்வா் பசவராஜ் பொம்மை தெரிவித்தாா்.

கா்நாடக சட்டப் பேரவையில் வெள்ளிக்கிழமை 2022-23-ஆம் ஆண்டுக்கான மாநில நிதிநிலை அறிக்கையை தாக்கல் செய்து அவா் பேசியது:

அறுதிப் பெரும்பான்மை பெற்ற கட்சியைப் புறந்தள்ளிட்டு, 2018-இல் அமைந்த கூட்டணி அரசால் வெற்றி பெற முடியவில்லை. தனிப்பெரும்பான்மை பலத்துடன் புதிய அரசு அமைந்தவுடன், கரோனா, வெள்ளம் போன்றவற்றுக்கு இடையில் நிலையான மற்றும் திறமையான நிா்வாகத்தின் காரணமாக மாநில வளா்ச்சியை நோக்கி பயணிக்கத் தொடங்கியுள்ளது. மத்திய அரசின் ஒத்துழைப்பு மற்றும் மாநில அரசின் தலைமையின் காரணமாக கரோனா பரவலை வெற்றிகரமாக கட்டுப்படுத்த முடிந்தது. கரோனா காலத்தில் பொருளாதாரத்தை மேம்படுத்த எடுக்கப்பட்ட முயற்சிகளுக்கு தற்போது பலன் கிடைக்கத் தொடங்கியுள்ளது. நிதி ஒழுக்கத்தை சீராகக் கடைப்பிடித்து, உயா் பொருளாதார வளா்ச்சியை அடையும் நோக்கில் மாநிலத்தின் ஒட்டுமொத்த வளா்ச்சிக்காக நிதிநிலை அறிக்கை தயாரிக்கப்பட்டுள்ளது.

கரோனா மற்றும் இயற்கைப் பேரிடா் சூழ்ந்திருந்த நிலையிலும், முதல்வராக நான் பொறுப்பேற்ற நாளிலேயே, விவசாயிகளின் குழந்தைகளுக்கு உயா்கல்வி படிப்பதற்கான உதவித்தொகை திட்டம், சமூக பாதுகாப்புத் திட்டங்களுக்கான மாத ஓய்வூதிய உயா்வு போன்ற முடிவுகளை எடுத்திருந்தேன். அதன் மூலம் மக்கள்நலன் சாா்ந்த அக்கறை புரிந்திருக்கும்.

பிரதமா் மோடியின் தலைமையில் மக்களின் இன்னல்களைக் குறைத்து, நிம்மதியான வாழ்க்கைக்கு வழிவகுக்கும் இலக்கோடு பயணித்துக் கொண்டிருக்கிறோம். எல்லோருக்கும் எல்லாம் என்ற கொள்கையை நோக்கிப் பணியாற்றி வருகிறோம். மாநிலத்தின் பொருளாதாரத்தில் மக்களை ஈடுபடுத்தவும், பங்காற்றவும் வைப்பதே எங்கள் நோக்கமாகும். இதற்காகவே, அடித்தள மக்களின் மேம்பாட்டுக்காக வேலைவாய்ப்பு, கல்வி, அதிகாரபரவலாக்கல் என்ற தாரக மந்திரத்தை வகுத்திருகிறோம்.

பெண்கள், பிற்படுத்தப்பட்டோா், தாழ்த்தப்பட்டோா், பழங்குடியினா், பொருளாதாரத்தில் பின் தங்கியோரின் மேம்பாட்டுக்காக வகுக்கப்பட்டுள்ள திட்டங்களை தீவிரமாகச் செயல்படுத்தி, மாநில பொருளாதாரத்தில் மக்களின் பங்களிப்பை அதிகரிக்க உள்ளோம். பிரதமா் மோடியின் கனவின்படி விவசாயிகளின் வருவாயை இரட்டிப்பாக்கவும் செயலாற்றி வருகிறோம்.

கடந்த 2 ஆண்டுகளாக உலகையே உலுக்கிய கரோனாவின் பிடியில் கா்நாடகம் மிகவும் மோசமாக பாதிக்கப்பட்டது. அதிக மழை மற்றும் வெள்ளத்தால் பொருளாதார இழப்புகளைச் சந்தித்தோம். 130 கோடி மக்களின் தேவைகளை அறிந்து கரோனா சவால்களை திறம்பட கையாண்ட பிரதமா்மோடிதான் உண்மையான மக்கள் தலைவராக உயா்ந்து நிற்கிறாா். முதல்வராக இருந்த எடியூரப்பாவின் தலைமையிலும் கரோனா சூழ்நிலை திறம்படக் கையாளப்பட்டுள்ளது.

மாநிலத்தில் அனைவருக்குமான, ஒருங்கிணைந்த பொருளாதார மற்றும் சமூக வளா்ச்சி, கல்வி, வேலைவாய்ப்பு, அதிகாரமளித்தல் திட்டங்களின் வாயிலாக நலிவடைந்த பிரிவினரின் மேம்பாடு மற்றும் பாதுகாப்பு, மனித வளா்ச்சி குறியீட்டைமேம்படுத்த பின் தங்கிய பகுதிகளை கண்டறிந்து, தகுந்த முக்கியத்துவம் அளிப்பது; வேளாண்மை, தொழில் மற்றும் சேவைத்துறைகளின் மக்களின் பங்களிப்புடன் முன்னேற்றம் அடைவது அரசின் நோக்கமாகும். புதிய சிந்தனை, புதிய ஆா்வம், புதிய போக்கு ஆகியவற்றுடன் புதிய இந்தியாவுக்கான புதிய கா்நாடகம் கட்டமைக்கப்படும் என்றாா்.