கத்தியால் குத்தி இளைஞர் கொலை

அம்பத்தூரில் முன்விரோதம் காரணமாக இளைஞரை மர்ம நபர்கள் கத்தியால் குத்திக் கொன்ற சம்பவம் பரபரப்பை ஏற்படுத்தியுள்ளது.
 அயப்பாக்கம் திருவீதியம்மன் கோயில் தெருவைச் சேர்ந்தவர் கமல்ராஜ் (28). காக்களூர் தொழிற்பேட்டையில் உள்ள தனியார் நிறுவனத்தில் வேலை செய்து வந்தார்.
 இவர் தனது நண்பர் ஆனந்துடன் சேர்ந்து திங்கள்கிழமை மாலை அம்பத்தூர் எம்.ஜி.ஆர் புரத்தில் உள்ள அரசு மதுக்கடையில் மது அருந்திவிட்டு கடை அருகே இருவரும் பேசிக் கொண்டிருந்தனர்.
 அப்போது அங்கு வந்த இரண்டு மர்ம நபர்கள், கமல்ராஜை சரமாரியாகக் கத்தியால் குத்தினர். இதில், அவர் பலத்த காயம் அடைந்தார். அதைக் கண்டதும் ஆனந்த் அங்கிருந்து தப்பிச் சென்றார்.
 பின்னர் இரு மர்ம நபர்களும் கமல்ராஜின் இரு சக்கர வாகனத்தில் ஏறி அங்கிருந்து தப்பிச் சென்றனர்.
 தகவல் அறிந்ததும் அம்பத்தூர் தொழிற்பேட்டை போலீஸார் அங்கு சென்று கமல்ராஜை, கீழ்பாக்கம் அரசு மருத்துவமனைக்கு அனுப்பி வைத்தனர். ஆனால், அவர் மருத்துவமனைக்குச் செல்லும் வழியிலேயே உயிரிழந்தார்.
 இதுகுறித்து அம்பத்தூர் தொழிற்பேட்டை காவல் நிலைய ஆய்வாளர் கர்ணன் வழக்குப் பதிந்து விசாரித்து வருகின்றார்.