கடன் தொல்லை: மெக்கானிக் தற்கொலை

சென்னை பெரம்பூரில் கடன் தொல்லையின் காரணமாக மெக்கானிக் தூக்கிட்டு தற்கொலை செய்து கொண்டார்.

பெரம்பூர் வடிவேல் தெருவைச் சேர்ந்தவர் நரேஷ்குமார் (28). இவர் மனைவி கவிதா. நரேஷ் ஏ.சி. மெக்கானிக்காக வேலை செய்து வந்தார். இந்நிலையில் நரேஷ் வெள்ளிக்கிழமை மாலை வீட்டில் இருந்தார். அப்போது கவிதா, வீட்டுக்குத் தேவையான சில பொருள்களை வாங்குவதற்காக அருகில் உள்ள கடைக்குச் சென்றார்.

சிறிது நேரத்துக்கு பின்னர், அவர் திரும்பி வந்தார். நரேஷ்குமார் அவர் அறையில் தூக்கிட்டு இறந்து கிடப்பதைப் பார்த்து கவிதா அதிர்ச்சியடைந்தார்.

இது குறித்து தகவலறிந்த செம்பியம் போலீஸார் சம்பவ இடத்துக்கு விரைந்து வந்து, நரேஷ்குமார் சடலத்தை கைப்பற்றி பிரேத பரிசோதனைக்கு அனுப்பி வைத்தனர்.

மேலும் இது குறித்து போலீஸார் வழக்குப் பதிவு செய்து, விசாரணையைத் தொடங்கினர். போலீஸார் நடத்திய விசாரணையில், நரேஷ் சிலரிடம் கடன் வாங்கியிருந்ததும், அந்தக் கடனை திருப்பிச் செலுத்த முடியாததால்,கடன் கொடுத்தவர்கள் நரேஷுக்கு நெருக்கடி கொடுத்ததும் தெரியவந்தது.

இந்த நெருக்கடியின் காரணமாகவே நரேஷ்குமார் தற்கொலை செய்திருக்க வேண்டும் என போலீஸ் தரப்பில் கூறப்படுகிறது.