பரங்கிமலை ரயில் விபத்து: உயிரிழந்தவரின் குடும்பத்தினர் இழப்பீடு கோரி ஆலோசனை

சென்னை பரங்கிமலை ரயில் விபத்தில் உயிரிழந்தவர்களில் ஒருவரின் குடும்பத்தினர் மட்டும் இழப்பீடுக்காக ரயில்வே தீர்ப்பாயத்தை திங்கள்கிழமை நாடினர்.
பரங்கிமலை ரயில் நிலையத்தில் அண்மையில் நிகழ்ந்த விபத்தில் 4 பேர் உயிரிழந்தனர்; 5 பேர் காயமடைந்தனர். சேத்துப்பட்டில் உள்ள ரயில்வே இழப்பீட்டு தீர்ப்பாயம் தாமாக முன்வந்து இந்த விபத்து குறித்து விசாரணை நடத்தியது. அதில், உயிரிழந்த 4 பேரின் குடும்பத்துக்கு தலா ரூ.8 லட்சம் இழப்பீடு வழங்க வேண்டும். மேலும் காயமடைந்தவர்களுக்கு தலா ரூ.2 லட்சம் இழப்பீடு வழங்க வேண்டும். விபத்து குறித்து தீர்ப்பாய அலுவலகத்தை அணுகலாம்' என உத்தரவிட்டிருந்தது. இதைத் தொடர்ந்து, விபத்து இழப்பீடு வழங்க தீர்ப்பாயத்தில் ரூ.42 லட்சத்தை தெற்கு ரயில்வே டெபாசிட் செய்துள்ளது. ஆனால், தீர்ப்பாயத்தை பாதிக்கப்பட்டவர்களின் குடும்பத்தினர் எவரும் ஞாயிற்றுக்கிழமை வரை அணுகவில்லை.
இந்நிலையில், சேத்துப்பட்டில் உள்ள ரயில்வே தீர்ப்பாயத்தை விபத்தில் உயிரிழந்த ஒருவரின் குடும்பத்தினர் திங்கள்கிழமை நாடினர். இழப்பீடு பெற விண்ணப்பிப்பது தொடர்பாக அவர்கள் ஆலோசனை பெற்றுச் சென்றுள்ளனர்.