சென்னை விமான நிலையத்தில் பிளாஸ்டிக் ஒழிப்பு விழிப்புணர்வு

சென்னை விமான நிலையத்தில் பிளாஸ்டிக் ஒழிப்பு குறித்த விழிப்புணர்வு நிகழ்ச்சி ஞாயிற்றுக்கிழமை நடைபெற்றது.
ஒரு முறை மட்டும் பயன்படுத்தும் பிளாஸ்டிக் உலகம் முழுவதும் 300 மில்லியன் டன் அளவுக்கு உற்பத்தி செய்யப்படுகிறது. இப்படி பயன்படுத்தி தூக்கி எறியப்படும் பிளாஸ்டிக்கால் நமது நீர்வழித் தடங்கள், நதிகள், பெருங்கடல்கள் போன்றவை சீர்கெட்டு சுற்றுச்சூழல் பாதிக்கப்படுகிறது என ஐ.நா. அறிக்கை தெரிவிக்கிறது. இதையடுத்து, பிளாஸ்டிக் உற்பத்தி மற்றும் பயன்பாட்டை தடுக்க உலக அளவில் பல்வேறு நடவடிக்கைகள் மேற்கொள்ளப்பட்டு வருகின்றன. இந்நிலையில் சென்னை விமான நிலையத்தில் பயணிகளிடையே இதுகுறித்த விழிப்புணர்வை ஏற்படுத்தும் வகையில் சிறப்பு நிகழ்ச்சி ஞாயிற்றுக்கிழமை நடைபெற்றது.
அப்போது முதலில் வந்த 1,000 பயணிகளுக்கு எளிதில் மக்கக் கூடிய, மறுசுழற்சி செய்யக்கூடிய ஷாப்பிங் பைகள் வழங்கப்பட்டன. அத்துடன் அடுத்து வந்த 5,000 பயணிகளுக்கு துணி பைகளும் வழங்கப்பட்டன. இந்த பைகளை சென்னை விமான நிலையப் போக்குவரத்து இயக்கப்பரிவு பொது மேலாளர் பி.கே.ஸ்ரீவத்சவா, துணை பொது மேலாளர் நந்த குமார் ஆகியோர் பயணிகளுக்கு விநியோகித்தனர். 
பிளாஸ்டிக் பயன்பாட்டை ஒழிக்க வேண்டும் என்பது குறித்து விழிப்புணர்வு ஏற்படுத்தி, அதற்கு தொடக்கமாக துணி பைகளை விமான நிலையத்தில் விநியோகித்தது எங்களுக்கு இன்ப அதிர்ச்சி அளிக்கும் வகையில் இருந்தது. இனி பிளாஸ்டிக் பைகளை நாங்கள் பயன்படுத்த மாட்டோம் என பயணிகள் சிலர் கூறினர்.