ராயபுரம் மண்டலத்தில் ஆக்கிரமிப்புகள் அகற்றம்

பெருநகர சென்னை மாநகராட்சியின் ராயபுரம் மண்டலத்தில் சாலையை ஆக்கிரமித்துக் கட்டப்பட்டிருந்த 20-க்கும் மேற்பட்ட வீடுகளை போலீஸார் உதவியுடன் மாநகராட்சி அதிகாரிகள் புதன்கிழமை அகற்றினர். 
ராயபுரம் மண்டலத்துக்கு உள்பட்ட வார்டு 56-இல் உள்ள மீரா லப்பை தெருவில் சாலையை ஆக்கிரமித்து 20-க்கும் மேற்பட்ட வீடுகள் கட்டப்பட்டிருந்தன. 
இந்த வீடுகளை அகற்றக் கோரி, அதன் உரிமையாளர்களுக்கு மாநகராட்சி சார்பில் கடந்த 2012-இல் நோட்டீஸ் வழங்கப்பட்டது. ஆனால், மாநகராட்சி நடவடிக்கையை எதிர்த்து ஆக்கிரமிப்பாளர்கள் சென்னை உயர்நீதிமன்றத்தில் வழக்குத் தொடர்ந்தனர்.
இந்த வழக்கில், மீரா லப்பை தெருவில் சாலையை ஆக்கிரமித்துக் கட்டப்பட்டிருந்த வீடுகள் உள்ளிட்ட ஆக்கிரமிப்புகளை அப்புறப்படுத்துமாறு சென்னை உயர்நீதிமன்றம் கடந்த ஆகஸ்ட் 2-ஆம் தேதி தீர்ப்பளித்தது. 
இதையடுத்து, காவல் துறையினரின் உதவியுடன் மீரா லப்பை தெருவில் ஆக்கிரமித்துக் கட்டப்பட்டிருந்த வீடுகளை பொக்லைன் இயந்திரம் மூலம் மாநகராட்சி அதிகாரிகள் புதன்கிழமை அகற்றினர். 
இதற்கு வீட்டின் உரிமையாளர்கள் சிலர் எதிர்ப்புத் தெரிவித்ததால் அப்பகுதியில் சிறிது நேரம் பரபரப்பு ஏற்பட்டது.