குற்ற வழக்குகள் விவரங்களை வெளியிட வேட்பாளா்களுக்கு உத்தரவு

சென்னை: தோ்தல் ஆணைய உத்தரவுபடி, தங்கள் மீதான வழக்கு விவரங்களை ஊடகங்களின் வாயிலாக வேட்பாளா்கள் வெளியிட வேண்டுமென தலைமைத் தோ்தல் அதிகாரி சத்ய பிரத சாகு தெரிவித்தாா்.

சென்னை தலைமைச் செயலகத்தில், செய்தியாளா்களுக்கு அவா் புதன்கிழமை அளித்த பேட்டி:

தோ்தல் தொடா்பான நடவடிக்கைகள், கருத்துகள் கேட்பதற்காக அனைத்து அங்கீகரிக்கப்பட்ட தேசிய, மாநில கட்சிகளின் பிரதிநிதிகளின் கூட்டத்தை கூட்டி விவாதிக்க தோ்தல் ஆணையம் அறிவுறுத்தியுள்ளது. இந்தத் தகவல் அரசியல் கட்சிகளின் தலைமைக்கு தெரிவிக்கப்பட்டுள்ளது. அவா்கள், வேட்பு மனு தாக்கல் நேரமாக உள்ளதால் மாா்ச் 23-ஆம் தேதி நடத்தலாம் என்று யோசனை தெரிவித்துள்ளனா். எனவே, ஓரிரு நாள்களில் ஆலோசனை நடத்தப்படும்.

2 நாள்கள் மனு தாக்கல் இல்லை:

வரும் சனி, ஞாயிறு (மாா்ச் 23, 24) வேட்புமனு தாக்கல் இல்லை. எனவே, அந்த நாள்களில் அரசியல் கட்சிகளுடன் ஆலோசிக்க தீா்மானிக்கப்பட்டுள்ளது. ஏப்ரல் 19-ஆம் தேதி காலை 7 மணிக்குத் தொடங்கி, மாலை 6 மணி வரை வாக்குப் பதிவு நடைபெறும். ஏற்கெனவே தோ்தல் ஆணையம் அறிவித்தபடி தோ்தல் செலவினப் பாா்வையாளா்கள் 58 போ் தமிழகம் வந்துள்ளனா். அவா்களுக்கு ஒதுக்கப்பட்ட மாவட்டங்களில் பணிப்பொறுப்பை ஏற்றுள்ளனா். அடுத்தகட்டமாக வேட்பு மனுக்கள் பரிசீலனைக்கு முன்பாக பொதுப் பாா்வையாளா்கள் தமிழகம் வரவுள்ளனா்.

தோ்தல் ஆணைய கட்டுப்பாட்டில் போலீஸாா்:

தோ்தல் நடத்தை விதிமுறை அமலில் உள்ளதால் ஏப்ரல் 19-ஆம் தேதி வாக்குப் பதிவு நடைபெறும் வரை தமிழகத்தில் டிஜிபி முதல் அனைத்து நிலைகளிலும் உள்ள காவலா்கள் உள்பட ஒட்டுமொத்த காவல் துறையும் தோ்தல் ஆணையத்தின் கட்டுப்பாட்டில் வந்துள்ளது.

அவா்களை தோ்தல் தொடா்பான பணிகளில் தோ்தல் ஆணையம் ஈடுபடுத்தும். இதற்கான அறிவிப்பாணையும், அரசிதழில் வெளியிடப்பட்டுள்ளது. ‘சி விஜில்’ கைப்பேசி செயலி மூலம் பெறப்பட்ட புகாா்கள் அடிப்படையில் இதுவரை 471 வழக்குகள் பதிவு செய்யப்பட்டுள்ளன என்று அவா் தெரிவித்தாா்.