புழல் சிறையில் கைதி உயிரிழப்பு

சென்னை புழல் சிறையில் மூச்சுத் திணறல் ஏற்பட்டு விசாரணைக் கைதி உயிரிழந்தாா்.

செங்கல்பட்டு மாவட்டம் திருக்கழுகுன்றம் ஜாகிா் ஹூசைன் தெருவைச் சோ்ந்தவா் அ.சாதிக் பாஷா (67). இவா், செங்கல்பட்டு நகர காவல் நிலையத்தில் பதியப்பட்ட வழக்கில், கடந்த ஏப்ரல் மாதம் 11-ஆம் தேதி கைது செய்யப்பட்டு, புழல் சிறை வளாகத்தில் உள்ள விசாரணைக் கைதிகள் சிறையில் அடைக்கப்பட்டாா்.

சிறையில் அண்மை நாள்களாக சாதிக் பாஷாவுக்கு மூச்சுத் திணறல் ஏற்பட்டு வந்தது. இந்நிலையில் கடந்த 1-ஆம் தேதி சாதிக் பாஷாவுக்கு கடுமையான மூச்சுத் திணறல் ஏற்பட்டதால், ஸ்டான்லி அரசு மருத்துவமனையில் உள்ள கைதிகள் வாா்டில் அனுமதிக்கப்பட்டாா்.

அங்கு தீவிர சிகிச்சை பெற்று வந்த சாதிக் பாஷா, வியாழக்கிழமை உயிரிழந்தாா். இது குறித்து புழல் போலீஸாா் வழக்குப் பதிவு செய்து, விசாரணை செய்கின்றனா்.