சாலையில் தேங்கி நிற்கும் தண்ணீர்:சுகாதாரச் சீர்கேடு ஏற்படும் அபாயம்

காஞ்சிபுரத்தில் சிறிய மழை பெய்தாலே நரசிங்கராயர் தெருவில் குளம்போல் தண்ணீர் தேங்கி சுகாதாரச் சீர்கேட்டை ஏற்படுத்தி வருகிறது.

காஞ்சிபுரத்தில் ஞாயிற்றுக்கிழமை நள்ளிரவு சுமார் ஒரு மணி நேரம் பலத்த மழை பெய்தது. இதனால், சாலையில் மழைநீர் வெள்ளமென பெருக்கெடுத்து ஓடியது. குறிப்பாக, காஞ்சிபுரம் நரசிங்கராயர் தெருவில் குளம்போல் தண்ணீர் தேங்கியது.

இந்தச் சாலை வழியாக பிள்ளையார்பாளையம், இரட்டை மண்டபம், கங்கைகொண்டான் மண்டபம், கைலாசநாதர் கோயில் உள்ளிட்ட பகுதிகளுக்குச் செல்லும் வாகன ஓட்டிகள் இந்த வழியாக வந்து செல்வது வழக்கம். மேலும், இங்கு ஒரு அரசு உதவி பெறும் பள்ளியின் விளையாட்டு மைதானமும் அமைந்துள்ளது. இதனால் மாணவர்கள் இந்த வழியாக விளையாட்டு மைதானத்துக்குச் செல்வது வழக்கம். இது போன்ற முக்கிய சாலையில் ஞாயிற்றுக்கிழமை பெய்த மழைக்கு குளம்போல மழைநீர் தேங்கி நின்றது.

இதுகுறித்து அப்பகுதி மக்கள் கூறுகையில், சிறிய மழை பெய்தாலே நரசிங்கராயர் தெருவில் மழைநீர் குளம்போல் தேங்கிவிடும். முறையான மழைநீர் வடிகால் அமைப்பு இல்லாததாலே, இப்பகுதி மக்கள் இந்த மழைநீரில் நடந்து செல்ல வேண்டிய அவலம் ஏற்படுகிறது. இந்த மழைநீர் வடிய ஓரிரு நாள்கள் ஆகிவிடும்.

இதனால் இப்பகுதியில் சுகாதாரச் சீர்கேடு ஏற்படுகிறது. இதைப் பார்வையிட்டு உரிய நடவடிக்கை எடுக்க நகராட்சி அதிகாரிகள் முன்வர வேண்டும் என்றனர்.