காஞ்சிபுரம் ஏகாம்பரநாதா் கோயிலில் லட்ச தீபம்

காஞ்சிபுரம்: காா்த்திகை மாத கடைசி சோமவாரத்தை (திங்கள்கிழமை) முன்னிட்டு, காஞ்சிபுரம் ஏகாம்பரநாதா் கோயிலில் பெண்கள் லட்ச தீபம் ஏற்றி வழிபட்டனா். சுவாமி வீதியுலா வரும் நிகழ்வும் நடைபெற்றது.

பஞ்சபூதத் தலங்களில் நிலத்துக்குரியதாக விளங்கும் ஏகாம்பரநாதா் கோயிலில் ஏராளமான பெண்கள் அகல் விளக்குகளால் திங்கள்கிழமை லட்ச தீபம் ஏற்றினா். கோயில் வளாகத்துக்குள் பெண்கள் தனித்தனி குழுக்களாக இணைந்து சிவலிங்கம், சிவனின் தோற்றம் போன்ற வடிவங்களில் கோலம் வரைந்து, அவற்றின் விளிம்புகளில் அகல் விளக்குகளால் தீபம் ஏற்றி சுவாமி தரிசனம் செய்தனா்.

காா்த்திகை சோமவாரத்தையொட்டி, மூலவா் தங்கக்கவச அலங்காரத்தில் பக்தா்களுக்கு காட்சியளித்தாா். முன்னதாக உற்சவா் ஏலவாா் குழலி அம்மனுக்கும், ஏகாம்பரநாதருக்கும் சிறப்பு அபிஷேகமும், தீபாராதனைகளும் நடைபெற்றன. பின்னா் சுவாமியும், அம்மனும் கேடயத்தில் வீதியுலா வந்தனா்.

கோயில் கலையரங்கில் நால்வா் நற்றமிழ் மன்றத்தின் சாா்பில் பக்தி இன்னிசைக் கச்சேரி நடைபெற்றது. பக்தா்கள் நீண்ட வரிசையில் காத்திருந்து சுவாமி தரிசனம் செய்தனா். காஞ்சிபுரம் சரக டிஐஜி பா.சாமுண்டீஸ்வரி, எஸ்.பி. தெ.சண்முகப்பிரியா, செங்கல்பட்டு சித்தி விநாயகா் கோயில் செயல் அலுவலா் செந்தில்குமாா் உள்ளிட்டோரும் சுவாமி தரிசனம் செய்தனா்.