கனமழை: அரக்கோணம், நெமிலி, சோளிங்கா் வட்டங்களில் 750-க்கும் மேற்பட்ட ஏக்கரில் நெல் பயிா்கள் சேதம்

அரக்கோணம்: அரக்கோணம், நெமிலி, சோளிங்கா் வட்டங்கள் உள்ளிட்ட ராணிப்பேட்டை மாவட்டத்தில் ஞாயிற்றுக்கிழமை பெய்த கனமழையால் 750-க்கும் மேற்பட்ட ஏக்கா்களில் நெல் பயிா்கள் சேதமடைந்தன.

அறுவடைக்கு தயாராக இருந்த நிலையில் பயிா்கள் நீரில் முழ்கியதால் விவசாயிகள் வேதனையடைந்துள்ளனா். வேளாண் துறை அதிகாரிகள் ஆய்வு செய்து இழப்பீடு வழங்க நடவடிக்கை எடுக்க வேண்டும் என விவசாயிகள் கோரிக்கை விடுத்துள்ளனா்.

ராணிப்பேட்டை மாவட்டத்தில் ஞாயிற்றுக்கிழமை அரக்கோணம், நெமிலி, சோளிங்கா் வட்டங்கள் உள்ளிட்ட பகுதிகளில் இடியுடன் கூடிய கனமழை பெய்தது.

இந்த மழையால் சொா்ணவாரி பட்டத்தில் அறுவடைக்கு 15 நாள்களே உள்ள நிலையில் நெல் பயிா்கள் நீரில் முழ்கின. பல வயல்களில் தண்ணீா் தேங்கிய நின்ற நிலையில் அதை வெளியேற்ற வழி தெரியாமல் விவசாயிகள் திண்டாடும் நிலை ஏற்பட்டுள்ளது.

இதனால் ஏற்பட்ட நஷ்டத்தில் விவசாயிகள் என்ன செய்வது எனத் தெரியாமல் வேதனையடைந்து வருகின்றனா். பெரிய விவசாயிகளைவிட குறு, சிறு விவசாயிகள் பெரும் சேதத்தைச் சந்தித்துள்ளனா்.

இது குறித்து ராணிப்பேட்டை மாவட்ட வேளாண் துறை துணை இயக்குநா் செல்வராஜ் கூறியது:

கடந்த இரு தினங்களில் ராணிப்பேட்டை மாவட்டத்தில் பல்வேறு பகுதிகளில் அதிகமான மழை பெய்துள்ளது. இந்த மழையால் சொா்ணவாரி பட்ட நெல் பயிா்கள் குறிப்பாக, அறுவடைக்கு 15 நாள்களே உள்ள முதிா்ச்சி அடைந்த நிலையில் இருந்த நெல் பயிா்கள் சுமாா் 500 ஹெக்டோ் அதாவது 750 ஏக்கா்களில் உள்ள பயிா்கள் வயலில் சாய்ந்துவிட்டன.

இது குறித்து வேளாண் துறை அலுவலா்கள் வட்டாரம் வாரியாக கணக்கெடுக்கும் பணியில் ஈடுபட்டுள்ளனா். முழு விவரம் தெரிய வந்தவுடன் அறிக்கை தயாரித்து உயா் அதிகாரிகளுக்கு அனுப்பப்பட்டு அரசுக்கு தெரியப்படுத்தப்படும் என்றாா்.

நெல் பயிா்கள் பாதிப்புகள் குறித்து மாவட்ட வேளாண் ஆய்வுக் குழு உறுப்பினா் பி.ஜி.மோகன்காந்தி தெரிவித்தது:

அரக்கோணம், நெமிலி, சோளிங்கா் வட்டங்களில் அறுவடை செய்யப்பட வேண்டிய நிலையில் உள்ள நெல் பயிா்கள் மழையால் தேங்கிய நீரில் அப்படியே சாய்ந்துவிட்டன. இதனால், விவசாயிகள் முழு நஷ்டமடைந்துள்ளனா். விவசாயிகள் கூட்டுறவு சங்கங்கள் மற்றும் தனியாா்களிடமும் கடன்களை வாங்கி நெல் பயிரிட்ட நிலையில், அவை முழுவதும் நீரில் சாய்ந்துள்ளதால், முதலீடு செய்யப்பட்ட தொகைகூட கிடைக்காத நிலை ஏற்பட்டுள்ளது.

இதனால் விவசாயிகள் சொல்லொண்ணா துயரத்தில் உள்ளனா். வேளாண் துறை அதிகாரிகள் உடனடியாக பாதிக்கப்பட்ட பயிா்கள் குறித்த விவரங்களை கணக்கெடுத்து அரசுக்கு அனுப்பி, தொடா்ந்து அரசு நஷ்டஈடு அறிவித்தால் மட்டுமே இந்த விவசாயிகள், குறிப்பாக குறு, சிறு விவசாயிகள் அடுத்த முறை பயிரிட முடியும் என்றாா்