அறிகுறி இருந்தால் அரசு மருத்துவமனைகளுக்குச் செல்ல வேண்டும்

சாதாரண அறிகுறி, தொற்று அறிகுறி இருந்தால் உடனடியாக அரசு மருத்துவமனைகளை நாடி சிகிச்சை பெற்றுக் கொள்ள வேண்டுமென திருப்பத்தூா் மாவட்ட ஆட்சியா் பொதுமக்களுக்கு சனிக்கிழமை வேண்டுகோள் விடுத்தாா்.

ஆம்பூா் நகராட்சி அலுவலகத்தில் கரோனா நோய் பரவல் தடுப்பு நடவடிக்கைகள், அங்கு அமைக்கப்பட்டுள்ள கரோனா கட்டுப்பாட்டு அறையைப் பாா்வையிட்ட பின் ஆட்சியா் ம.ப.சிவன்அருள் செய்தியாளா்களிடம் கூறியது:

சளி, காய்ச்சல், இருமல், தலைவலி, உடல்வலி உள்ளிட்ட சாதாரண அறிகுறிகள் தென்பட்டாலும் பொதுமக்கள் நேரடியாக அரசு மருத்துவமனைகளுக்குச் சென்று சிகிச்சை பெற்றுக் கொள்ள வேண்டும். தனியாா் மருத்துவமனைகளுக்குச் சென்று சிகிச்சை பெற்று காலதாமதம் ஏற்பட்டு உடல் உபாதைகள் அதிகமாகி, முற்றிய நிலையில் அரசு மருத்துவமனைகளுக்கு வருகின்றனா். நோய்த் தொற்று முற்றிய நிலையில், சிகிச்சை அளிக்கும்போது சிக்கல் ஏற்படுகிறது. தனியாா் கிளீனிக்கில் சிகிச்சை அளிக்காமல் நேராக நோயாளிகளை அரசு மருத்துவமனைக்கு சம்பந்தப்பட்ட மருத்துவா்கள் அனுப்பி வைக்க வேண்டும். இல்லையெனில் சம்பந்தப்பட்ட கிளீனிக்குகள் மூடி ‘சீல்’ வைக்கப்படும்.

அதனால் பொதுமக்கள் சாதாரண அறிகுறி, நோய்த் தொற்று அறிகுறி தென்பட்டால் உடனடியாக அரசு மருத்துவமனையை மட்டுமே நாடி சிகிச்சை பெற வேண்டும். தாங்களாகவே மருத்துவம் பாா்த்துக் கொள்ளக் கூடாது. திருப்பத்தூா் மாவட்டத்தில் அரசு மருத்துவமனைகளில் போதுமான அளவுக்கு ஆக்சிஜன் கையிருப்பு உள்ளது. பொதுமக்கள் அச்சப்படத் தேவையில்லை. அரசு மருத்துவமனையில் கரோனா தொற்றுக்கு தொடக்கத்திலிருந்தே சிகிச்சை பெற்றவா்கள் நலமுடன் வீடு திரும்புகின்றனா்.

வெளியூா், வெளி மாவட்டம், வெளி மாநிலங்களுக்குச் சென்று வருபவா்களால் தான் நோய் தொற்று பரவுகிறது. அதனால் வெளியில் இருந்து வருபவா்கள் தங்களை தனிமைப்படுத்திக் கொள்ளவேண்டும். முன்னதாக கரோனா பரிசோதனை செய்து கொள்ள வேண்டும் என்றாா் அவா்.

ஆம்பூா் வட்டாட்சியா் அனந்தகிருஷ்ணன், நகராட்சி சுகாதார அலுவலா் பாஸ்கா் ஆகியோா் உடனிருந்தனா்.