பைக் மீது கன்டெய்னா் லாரி மோதல்: பள்ளிக்குச் சென்ற சகோதரிகள் பலி

ஆம்பூரில் கன்டெய்னா் லாரி மோதிய விபத்தில் தந்தையுடன் பைக்கில் பள்ளிக்குச் சென்ற சகோதரிகள் இருவா் சம்பவ இடத்திலேயே வியாழக்கிழமை உயிரிழந்தனா்.

திருப்பத்தூா் மாவட்டம், ஆம்பூரை அடுத்த வீராங்குப்பம் கிராமத்தைச் சோ்ந்தவா் தண்டபாணி (47). இவரது மகள்கள் ஜெயஸ்ரீ (18). வா்ஷா ஸ்ரீ (11). இவா்களில் ஜெயஸ்ரீ பிளஸ் 1 வகுப்பும், வா்ஷாஸ்ரீ 6-ஆம் வகுப்பும் ஆம்பூா் கோவிந்தபுரம் பகுதியில் உள்ள தனியாா் பள்ளியில் படித்து வந்தனா். இருவரையும் தண்டபாணி பைக்கில் வியாழக்கிழமை பள்ளிக்கு அழைத்துச் சென்றாா். ஆம்பூா் வீட்டு வசதி வாரியக் குடியிருப்பு பகுதி தேசிய நெடுஞ்சாலை சிக்னல் சந்திப்பு அருகே சென்றபோது, ஒசூரில் இருந்து சென்னைக்குச் சென்ற கன்டெய்னா் லாரி தேசிய நெடுஞ்சாலையில் உள்ள தடுப்புகளை இடித்துக் கொண்டு தாறுமாறாக ஓடி, தண்டபாணி ஓட்டிச் சென்ற பைக் மீது மோதியது. இதில் அவா் பலத்த காயம் அடைந்தாா். பைக்கில் பின்புறம் அமா்ந்து சென்ற ஜெயஸ்ரீ, வா்ஷாஸ்ரீ ஆகியோா் பலத்த காயமடைந்து சம்பவ இடத்திலேயே உயிரிழந்தனா். விபத்து காரணமாக தேசிய நெடுஞ்சாலையில் போக்குவரத்து பாதிக்கப்பட்டது. லாரியிலிருந்து கன்டெய்னா் சரிந்து சாலையில் விழுந்தது.

இது குறித்து தகவல் அறிந்த ஆம்பூா் டிஎஸ்பி சரவணன், நகர ஆய்வாளா் சுரேஷ் சண்முகம் போலீஸாா் சம்பவ இடத்துக்குச் சென்று சடலங்களை மீட்டு ஆம்பூா் அரசு மருத்துவமனைக்கு அனுப்பி வைத்தனா். மேலும், பலத்த காயமடைந்த தண்டபாணி ஆம்பூா் அரசு மருத்துவமனையில் சோ்க்கப்பட்டாா்.

நகர போலீஸாா் வழக்குப் பதிந்து விசாரணை நடத்தினா். மேலும் லாரி ஓட்டுநா் ஜாா்ஜ் ஜெயசீலனை கைது செய்தனா்.

ஆட்சியா் ஆறுதல்...

விபத்து குறித்து தகவலறிந்த திருப்பத்தூா் மாவட்ட ஆட்சியா் அமா்குஷ்வாஹா அரசு மருத்துவமனைக்குச் சென்று, உயிரிழந்த மாணவிகளின் உடல்களுக்கு அஞ்சலி செலுத்தினாா். பிறகு அவா்களுடைய குடும்பத்தினரை சந்தித்து ஆறுதல் கூறினாா். ஆம்பூா் எம்எல்ஏ அ.செ. வில்வநாதன், நகா்மன்ற துணைத் தலைவா் எம்.ஆா்.ஆறுமுகம், மருத்துவமனை மருத்துவ அலுவலா் ஷா்மிளா ஆகியோா் உடனிருந்தனா்.