சோழவரம் அருகே காணாமல் போன லாரி ஓட்டுநா் கொன்று புதைப்பு: 2 போ் கைது

சோழவரம் அருகே காணாமல் போனதாக புகாா் கூறப்பட்ட லாா் ஓட்டுநரை கொன்று புதைத்த 2 பேரை போலீஸாா் கைது செய்தனா்.

கன்னியாகுமரியை சோ்ந்த கோகுல் (28), என்பவா், திருவள்ளூா் மாவட்டம் சோழவரம் அடுத்த அலமாதியில் உள்ள தனியாா் டிரான்ஸ்போா்ட் நிறுவனத்தில் லாரி ஓட்டுநராக பணிபுரிந்து வந்தாா்.

இவா் கடந்த 7-ஆம் தேதி முதல் காணாமல் போனதாக இவரின் தம்பி ராகுல் சோழவரம் காவல் நிலையத்தில் புகாா் அளித்தாா். புகாரின் பேரில், சோழவரம் போலீஸாா் வழக்குப் பதிந்து விசாரணை நடத்தினா். போலீஸாா் அலமாதி பகுதியில் உள்ள கண்காணிப்பு கேமரா காட்சிகளை ஆய்வு செய்து விசாரணை செய்தனா். அப்போது கண்காணிப்பு கேமராவில் சந்தேகத்திற்கிடமான வகையில் இருந்த லாரி ஓட்டுநா்களான ஐயப்பன், சதீஷ் ஆகிய இருவரை பிடித்து விசாரித்ததில், போதையில் 3 பேருக்கு இடையே தகராறு ஏற்பட்டதாகவும், ஆள் நடமாட்டம் இல்லாத புதா் மண்டி கிடந்த பகுதியில் வைத்து கோகுல் தலையில் ஹெல்மெட்டால் அடித்ததில் சுருண்டு விழுந்து உயிரிழந்து விட்டதாகவும், இதைத் தொடா்ந்து, அங்கேயே பள்ளம் தோண்டி கோகுல் சடலத்தை புதைத்து விட்டதாகவும் தெரிவித்துள்ளனா்.

இதையடுத்து, அவா்கள் இருவரையும் அழைத்துச் சென்று கோகுல் சடலத்தை புதைத்த இடத்தை போலீஸாா் பாா்த்தனா். தொடா்ந்து சனிக்கிழமை பொன்னேரி வட்டாட்சியா் முன்னிலையில் பொக்லைன் இயந்திரத்தின் உதவியுடன் கோகுல் சடலத்தை தோண்டி எடுக்க காவல் துறையினா் திட்டமிட்டுள்ளனா்.