"விலையில்லாப் பொருள்கள் விநியோகத்துக்கு 96 சதவீத மக்கள் ஆதரவு'

தமிழக அரசு வழங்கும் விலையில்லாப் பொருள்கள் திட்டத்துக்கு தமிழகத்தின் 96 சதவீத மக்கள் ஆதரவு தெரிவித்துள்ளதாக அமைச்சர் முக்கூர் என்.சுப்பிரமணியன் கூறினார்.

திருவண்ணாமலையை அடுத்த இனாம்காரியந்தல் கிராமத்தில் நடைபெற்ற விழாவில் 1,013 பேருக்கு விலையில்லா மிக்ஸி, கிரைண்டர், மின்விசிறிகள், மாணவர்களுக்கான விலையில்லா மடிக்கணினிகளை தமிழக தகவல் தொழில்நுட்பத் துறை அமைச்சர் முக்கூர் என்.சுப்பிரமணியன் வழங்கினார்.

இனாம்காரியந்தல் அரசு மேல்நிலைப் பள்ளி வளாகத்தில் ஞாயிற்றுக்கிழமை நடைபெற்ற விழாவுக்கு, மாவட்ட ஆட்சியர் அ.ஞானசேகரன் தலைமை வகித்தார். மாவட்ட ஊராட்சிக் குழுத் தலைவர் எம்.எஸ்.நைனாக்கண்ணு, மக்களவை உறுப்பினர் ஆர்.வனரோஜா, எம்எல்ஏ ஏ.கே.அரங்கநாதன் ஆகியோர் முன்னிலை வகித்தனர். மாவட்ட செய்தி மக்கள் தொடர்பு அலுவலர் பா.முத்தமிழ்ச் செல்வன் வரவேற்றார்.

தமிழக தகவல் தொழில்நுட்பத் துறை அமைச்சர் முக்கூர் என்.சுப்பிரமணியன் பங்கேற்று 964 பயனாளிகளுக்கு விலையில்லா மிக்ஸி, கிரைண்டர், மின்விசிறிகளை வழங்கினார்.

மேலும், பள்ளி மாணவ, மாணவிகள் 49 பேருக்கு விலையில்லா மடிக்கணினிகளை வழங்கிப் பேசியதாவது, அண்மையில் வெளியிடப்பட்ட கருத்துக் கணிப்பில் தமிழகத்தின் 96 சதவீதம் மக்கள் தமிழக அரசு வழங்கும் மிக்ஸி, கிரைண்டர், மின்விசிறி திட்டத்துக்கு ஆதரவு தெரிவித்துள்ளனர்.

சென்னையில் நடைபெற்ற உலக முதலீட்டாளர்கள் மாநாட்டில் தமிழகத்தில் ரூ. 2 கோடியே 42 லட்சத்து 160 கோடி முதலீடுகள் ஈர்க்கப்பட்டுள்ளன. தமிழகத்தை அனைத்துத் துறைகளிலும் முன்னேற்ற முதல்வர் ஜெயலலிதா அயராது பாடுபட்டு வருகிறார் என்றார்.

விழாவில் முன்னாள் அமைச்சர் எஸ்.ராமச்சந்திரன், துரிஞ்சாபுரம் ஊராட்சி ஒன்றியக் குழுத் தலைவர் அ.கோவிந்தராஜ், சிறப்பு செயலாக்கத் திட்ட தனித்துணை ஆட்சியர் ராணி உள்பட அரசுத் துறை அதிகாரிகள், பொதுமக்கள் கலந்து கொண்டனர்.