குலைநோய்த் தாக்குதலால் நெல் பயிர்கள் பாதிப்பு

வந்தவாசி அருகே 20 ஏக்கரில் பயிரிடப்பட்டுள்ள நெல்பயிர்கள் குலைநோய்த் தாக்குதலுக்கு உள்ளாகி இருப்பதால் விவசாயிகள் வேதனை அடைந்துள்ளனர்.
வந்தவாசியை அடுத்த கீழ்சீசமங்கலம் கிராமத்தைச் சேர்ந்தவர் விவசாயி ஏழுமலை. இவர் கடந்த புரட்டாசி மாதம் சுமார் 10 ஏக்கரில் வெள்ளை பொன்னி நெல் பயிரிட்டார். அறுவடைக்கு இன்னும் 20 நாள்களே உள்ள நிலையில், கடந்த வாரம் நெல்பயிரை குலைநோய் தாக்கியுள்ளது. மேலும் அருகில் உள்ள மற்ற சில விவசாயிகளின் 10 ஏக்கர் நிலத்தில் பயிரிடப்பட்டுள்ள வெள்ளை பொன்னி நெல்பயிரையும் குலைநோய் தாக்கியுள்ளது. 
சுமார் 70 சதவீத நெல்பயிர்கள் பாதிக்கப்பட்டுவிட்டது. இன்னும் சில தினங்களில் மீதம் உள்ள நெல்பயிரும் பாதிப்புக்குள்ளாகும். அதனால், தங்களுக்கு உரிய இழப்பீடு வழங்க வேண்டும் என்று விவசாயிகள் கோரிக்கை விடுத்துள்ளனர்.  இதுகுறித்து அவர்கள் கூறியதாவது:
ஓர் ஏக்கருக்கு ரூ.20 ஆயிரம் வரை செலவு செய்துள்ளோம். ஆனால், குலைநோய்த் தாக்குதலால் எங்களுக்கு வைக்கோல் கூட மிஞ்சப் போவதில்லை. இந்த நஷ்டத்தை எப்படி தாங்குவது என்று தெரியவில்லை. எனவே, எங்களுக்கு உரிய இழப்பீடு வழங்க அரசு உடனடியாக நடவடிக்கை எடுக்க வேண்டும் என்றனர்.