தொழிலாளி வீட்டில் 25 பவுன் திருட்டு

செய்யாறு அருகே டைல்ஸ் பதிக்கும் தொழிலாளி வீட்டின் பூட்டை உடைத்து 25 பவுன் நகைகள், 
ரூ. ஒரு லட்சத்து 42 ஆயிரம் ரொக்கத்தை திருடிச் சென்ற மர்ம நபர்களை போலீஸார் தேடி வருகின்றனர்.
வெம்பாக்கத்தை அடுத்த பல்லாவரம் கிராமம் கெங்கையம்மன் கோயில் தெருவைச் சேர்ந்தவர் டைல்ஸ் பதிக்கும் தொழிலாளி துலுக்கானம் (46). இவர், புதன்கிழமை வீட்டை பூட்டிவிட்டு குடும்பத்தினருடன் தங்களது நிலத்தில் நடைபெற்ற நெல் அறுவடை பணிக்குச் சென்றார். பிற்பகல் வீடு திரும்பியபோது, கதவின் பூட்டு உடைக்கப்பட்டிருந்தது. உள்ளே சென்று பார்த்தபோது, பீரோவில் மகளின் திருமணத்துக்காக வைத்திருந்த 25 பவுன் நகைகள், நெல் விற்ற பணம் ரூ.67 ஆயிரம், புதுமனை புகுவிழாவின்போது வந்த அன்பளிப்புப் பணம் ரூ.75 
ஆயிரம் ஆகியவை திருடப்பட்டு இருந்ததாம். இதுகுறித்து தூசி போலீஸார் வழக்குப் பதிந்து விசாரித்து வருகின்றனர்.