சேவூரில் அதிமுக ஆலோசனைக் கூட்டம்: அமைச்சர் பங்கேற்பு

திருவண்ணாமலை வடக்கு மாவட்ட அதிமுக சார்பில், ஆரணியை அடுத்த சேவூரில் மக்களவைத் தேர்தலுக்கான வாக்குச் சாவடி பொறுப்பாளர்களை நியமிப்பது குறித்த ஆலோசனைக் கூட்டம் புதன்கிழமை நடைபெற்றது.
சேவூர் ஓசூர் அம்மன் கோயில் அருகில் நடைபெற்ற இந்தக் கூட்டத்துக்கு மாவட்டச் செயலர் தூசி கே.மோகன் தலைமை வகித்தார். இதில், இந்து சமய அறநிலையத் துறை அமைச்சர் சேவூர் எஸ்.ராமச்சந்திரன் சிறப்பு விருந்தினராக கலந்து கொண்டு பேசியதாவது:
மக்களவைத் தேர்தலுக்கு ஒரு வாக்குச் சாவடிக்கு 18 பொறுப்பாளர்கள் நியமிக்கப்படவுள்ளனர். அதன்படி, நியமிக்கப்படும் பொறுப்பாளர்கள் ஆரணி தொகுதியிலும், திருவண்ணாமலை மாவட்டத்திலும் அதிமுக ஆட்சியில் செயல்படுத்தப்பட்டுள்ள பல்வேறு அரசுத் திட்டங்களை பொதுமக்களிடையே எடுத்துக்கூறி அதிமுகவுக்கு வாக்களிக்கச் செய்ய வேண்டும். சென்னை - சேலம் பசுமை வழிச்சாலை திருவண்ணாமலை மாவட்டத்தில் 123 கி.மீ. தொலைவுக்கு அமைக்கப்படுகிறது. இதனால், இந்தச் சாலையையொட்டி பல்வேறு தொழில்சாலைகள் அமைய வாய்ப்பு ஏற்படும். பின்தங்கிய மாவட்டமான திருவண்ணாமலை முன்னேறுவதற்கான வாய்ப்பாக இந்தத் திட்டம் அமையும் என்றார்.
கூட்டத்தில், ஆரணி தொகுதி எம்.பி. செஞ்சி சேவல் வி.ஏழுமலை, நகர ஜெயலலிதா பேரவைச் செயலர் பாரி பி.பாபு, மாவட்ட, நகர, ஒன்றிய, பேரூர்கழகம், பிற அணி நிர்வாகிகள் பிஆர்ஜி.சேகர், எம்.வேலு, எ.அசோக்குமார், ஜி.வி.கஜேந்திரன், டி.கருணாகரன், ரமணிநீலமேகம், அ.கோவிந்தராசன், தெள்ளார் சீனிவாசன், டி.வி.பச்சியப்பன், ஜி.செல்வராஜ், கிருஷ்ணன், நாகப்பன், தங்கராஜ், ஓட்டல் பாஷா, பாண்டியன், ராதாகிருஷ்ணன் உள்ளிட்டோர் கலந்து கொண்டனர்.