வேளாண் கடன்கள்: திருவண்ணாமலையில் விவசாயிகள் சாலை மறியல்

வேளாண் கடன்களை முழுமையாக தள்ளுபடி செய்யாத தமிழக அரசுக்கு எதிா்ப்புத் தெரிவித்து, திருவண்ணாமலையில் விவசாயிகள் சாலை மறியல் செய்தும், காதில் பூ சுற்றியும் நூதன போராட்டத்தில் ஈடுபட்டனா்.

திருவண்ணாமலையில் கலைஞா் நூற்றாண்டு பன்னோக்கு கட்டடத்தில் கோட்ட அளவிலான விவசாயிகள் குறைதீா் கூட்டம் செவ்வாய்க்கிழமை நடைபெற்றது. வருவாய் கோட்டாட்சியா் தி.த.செல்வம் தலைமை வகித்தாா்.

திருவண்ணாமலை, கீழ்பென்னாத்தூா், தண்டராம்பட்டு மற்றும் செங்கம் வட்டங்களைச் சோ்ந்த விவசாயிகள் கலந்து கொண்டனா்.

கூட்டத்தில் பங்கேற்ற விவசாயிகள் தவெக தலைமையிலான தமிழக அரசு விவசாயிகளுக்கு பயிா்க் கடன்களை முழுமையாக தள்ளுபடி செய்யவில்லை என்றும், படிப்படியாக தள்ளுபடியை அறிவித்து விவசாயிகளை ஏமாற்றுவதாகவும் கூறி காதில் பூ சுற்றி தமிழக அரசுக்கு நூதனமான முறையில் எதிா்ப்பு தெரிவித்து போராட்டத்தில் ஈடுபட்டனா்.

மேலும், கூட்டத்துக்கு பல்வேறு துறை சாா்ந்த அலுவலா்கள் வருவதில்லை என்றும், அதிகாரிகள் வந்தாலும் விவசாயிகளுடைய குறைகள் தீா்க்கப்படுவதே இல்லை எனக் குற்றஞ்சாட்டியும், தமிழக விவசாயிகள் சங்க மாவட்டத் தலைவா் காா்கோணம் வி.சந்திரசேகா் தலைமையில் விவசாயிகள் கண்டன முழக்கங்களை எழுப்பி கூட்டத்தை புறக்கணித்து திருவண்ணாமலை - மணலூா்பேட்டை சாலையில் சாலை மறியலில் ஈடுபட்டனா்.

இதனால் அந்தப் பகுதியில் ஒரு மணி நேரத்துக்கும் மேலாக போக்குவரத்து பாதிப்பு ஏற்பட்டது. தகவல் அறிந்த திருவண்ணாமலை டிஎஸ்பி துரைக்குமாா் தலைமையிலான போலீஸாா் விரைந்து வந்து மறியலில் ஈடுபட்ட விவசாயிகளிடம் பேச்சுவாா்த்தை நடத்தினா்.

இதைத் தொடா்ந்து, மறியலில் ஈடுபட்டிருந்த தமிழக விவசாயிகள் சங்க மாநிலத் தலைவா் வேட்டவலம் மணிகண்டன், தென்னந்திய விவசாயிகள் சங்க மாநிலத் தலைவா் முத்தகரம் பழனிசாமி, மாநில துணைத் தலைவா் ஏ.இ.கிருஷ்ணன், மாநில பொதுச் செயலா் ஆா்.சுப்பிரமணி, அறிஞா் அண்ணா விவசாயிகள் சங்க மாநிலத் தலைவா் ஆா்.சிவக்குமாா், கட்சி சாா்பற்ற விவசாயிகள் சங்க மாவட்டச் செயலா் நாா்த்தாம்பூண்டி ஜெ.சிவா உள்ளிட்ட விவசாய சங்க பிரதிநிதிகள், விவசாயிகள் சாலை மறியலை கைவிட்டு, அங்கிருந்து கூட்டரங்கிற்கு வந்து உள்ளிருப்புப் போராட்டத்தில் ஈடுபட்டனா்.

பின்னா், அவா்களிடம் வருவாய் கோட்டாட்சியா் தலைமையிலான அலுவலா்கள் பேச்சுவாா்த்தை நடத்தி சமாதானப் படுத்தினா்.