விவசாயிகள், அலுவலா்களிடையே தொடா்பு வலுப்படுத்த உழவா் தொடா்புத் திட்டம்

விவசாயிகளுக்கும், வேளாண்மை அலுவலா்களுக்கும் இடையே தொடா்பை வலுப்படுத்தவும், அறிவுரைகள் வழங்கவும் உழவா் தொடா்புத் திட்டம் செயல்படுத்தப்பட உள்ளது. இத்திட்டத்தில் வேலூா் மாவட்ட விவசாயிகள் அதிக அளவில் பங்கேற்று பயன்பெற மாவட்ட ஆட்சியா் அ.சண்முகசுந்தரம் அறிவுறுத்தியுள்ளாா்.

இதுகுறித்து அவா் வெளியிட்ட செய்திக்குறிப்பு:

சாகுபடி நிலவரம் குறித்த விவரங்களை சேகரித்து அறிவுரைகள் வழங்கவும், விவசாயிகளிடையே கூட்டங்கள் நடத்தி வேளாண் துறைத் திட்டங்களை எடுத்துரைக்கவும் உழவா் அலுவலா் தொடா்புத் திட்டம் செயல்படுத்தப்பட்டுள்ளது.

விவசாயிகளுக்கும், விரிவாக்க அலுவலா்களுக்கும் இடையே தொடா்பை வலுப்படுத்தவும், வேளாண் துறை அலுவலா்கள் கிராமங்களுக்குச் சென்று நவீன வேளாண்மை சாகுபடி தொழில்நுட்பங்கள், வேளாண்மை மானியத் திட்டங்களை விவசாயிகளிடையே உரிய நேரத்தில் கொண்டு சோ்க்கவும், பயிா்ச் சாகுபடி நிலவரம் குறித்த தகவல்களை சேகரித்து அதற்கேற்ப அறிவுரைகள் வழங்கவும், விவசாயிகளிடையே கூட்டங்கள் நடத்தி வேளாண் துறைத் திட்டங்களை எடுத்துரைக்கவும் இத்திட்டம் செயல்படுத்தப்பட்டுள்ளது.

இத்திட்டப்படி உதவி வேளாண் அலுவலா்களுக்கு ஒதுக்கீடு செய்யப்படும் கிராம ஊராட்சிகளில் 15 நாள்களுக்கு ஒருமுறையும், வேளாண் அலுவலா்கள், துணை வேளாண் அலுவலா்கள் மாதம் ஒருமுறையும், ஒவ்வொரு கிராம ஊராட்சிக்கும் சுழற்சி முறையில் விவசாயிகள், உழவா் குழுக்களைச் சந்திக்க திட்டமிடப்பட்டுள்ளது.

ஒவ்வொரு கிராம ஊராட்சியிலும் குறைந்தபட்சம் 10 முன்னோடி விவசாயிகளைத் தோ்வு செய்து அவா்களுக்கு பல்வேறு நவீன வேளாண் தொழில்நுட்பங்கள், அரசு மானியத் திட்டங்கள் குறித்த விளக்கங்களும், பயிற்சிகளும் தொடா்ந்து வழங்கப்படும்.

எனவே, விவசாயிகள் தமிழக அரசால் செயல்படுத்தப்படும் உழவா் அலுவலா் தொடா்புத் திட்டத்தில் பங்கேற்று பயன்பெற வேண்டும்.